সুধাকণ্ঠ ডঃ ভূপেন হাজৰিকাৰ ১৪তম মৃত্যু বাৰ্ষিকী মাৰ্ঘেৰিটাত সম জিলা প্ৰশাসন, দল সংগঠনৰ উদ্যোগত উদযাপন
মাৰ্ঘেৰিটা:
ভাৰত ৰত্ন সুধাকণ্ঠ ডঃ ভূপেন হাজৰিকাৰ ১৪তম মৃত্যু বাৰ্ষিকী গভীৰ শ্ৰদ্ধা আৰু সাংস্কৃতিক ভক্তিৰে মাৰ্ঘেৰিটাত উদযাপন কৰা হয়। পুৱা মাৰ্ঘেৰিটা সমজিলা প্ৰশাসনৰ উদ্যোগত উত্তৰ মাৰ্ঘেৰিটা ৰংমঞ্চত উদযাপন কৰা হয়। অনুষ্ঠানটো মাৰ্ঘেৰিটা সম-জিলা প্রশাসন আৰু সাংস্কৃতি পৰিক্ৰমা বিভাগৰ যৌথ উদ্যোগত আয়োজন কৰা হয়। অনুষ্ঠানটো সুধাকণ্ঠ ডঃ ভূপেন হাজৰিকাৰ প্ৰতিচ্ছবিত মাল্যাৰ্পণৰ দ্বাৰা আৰম্ভ হয়। তাৰ পাছত সম-জিলা আয়ুক্ত ৰাহুল দলে, এ.চি.এছ, আদৰণি ভাষণ প্ৰদান কৰি ভূপেন হাজৰিকাৰ প্ৰতি শ্ৰদ্ধাঞ্জলি জ্ঞাপন কৰে। আয়ুক্তই দলে ভাষণ প্ৰসংগত উল্লেখ কৰে যে ভূপেন দা কেৱল এজন সংগীতজ্ঞ বা সুৰকাৰ নহয়, তেওঁ এজন দাৰ্শনিক আৰু দূৰদৰ্শী ব্যক্তিত্ব আছিল, যিয়ে নিজৰ গীতৰ জৰিয়তে মানৱতা, ভ্ৰাতৃত্ববোধ আৰু ন্যায়ৰ
বাৰ্তা প্ৰচাৰ কৰিছিল। তেওঁ কয় যে সুধাকণ্ঠ ডঃ ভূপেন হাজৰিকাৰ গীতসমূহ মানৱতা আৰু আশাৰ মূলত যিয়ে সমাজক চিৰদিনে ঐক্য, শান্তি আৰু প্ৰেমৰ পথত আগবঢ়াই ৰাখিছে। ভূপেন দাৰ অমৰ গীত “মানুহে মানুহৰ বাবে” সমবেতভাৱে গাই মাৰ্ঘেৰিটাৰ ১২খন শিক্ষা প্ৰতিষ্ঠানৰ প্ৰায় ৫০০জন ছাত্র-ছাত্ৰীয়ে পৰিৱেশন আগবঢ়ায়। এই শিক্ষা প্ৰতিষ্ঠানসমূহ হ’ল — কেতেতং জনজাতি উচ্চ মাধ্যমিক বিদ্যালয়, গান্ধী বিদ্যা মন্দিৰ উচ্চ মাধ্যমিক বিদ্যালয়, এ. আৰ. অ্যান্ড টী উচ্চ মাধ্যমিক বিদ্যালয়, নিজমাকুম উচ্চ মাধ্যমিক বিদ্যালয়, পাৱৈ এম.ভি. এছ., লোকপ্ৰিয় গোপীনাথ এম.ই. এছ., টাউন উচ্চ মাধ্যমিক বিদ্যালয় মাৰ্ঘেৰিটা, লিডু বজাৰ উচ্চ মাধ্যমিক বিদ্যালয়, শংকৰদেৱ বিদ্যাপীঠ উচ্চ মাধ্যমিক বিদ্যালয়, মাৰ্ঘেৰিটা পি.এইচ. এছ. বিদ্যালয়, লিডু মহাবিদ্যালয় আৰু মাৰ্ঘেৰিটা মহাবিদ্যালয়ৰ ছাত্ৰ ছাত্ৰী সকল। এই পৰিৱেশনৰ সময়ত স্থানীয় শিল্পী মহেন্দ্ৰ দাসে সুধাকণ্ঠ ডঃ ভূপেন হাজৰিকাৰ এক প্ৰতিচ্ছবি অঙ্কন কৰে, যিয়ে সংগীত আৰু শিল্পকলাৰ এক অনন্য দৃষ্টান্ত সৃষ্টি কৰে। মুখ্য অতিথি হিচাপে মাৰ্ঘেৰিটাৰ বিধায়ক ভাস্কৰ শৰ্মাই ভূপেন হাজৰিকাৰ মহৎ ঐতিহ্যৰ বিষয়ে উল্লেখ কৰি কয় যে সুধাকণ্ঠই নিজৰ গীত, চিন্তা-চেতনা আৰু দৰ্শনৰ জৰিয়তে আজি আমাৰ মাজত জীৱন্ত। তেওঁ উল্লেখ কৰে যে ভূপেন দাৰ সৃষ্টি যুগে যুগে সমাজক ঐক্য আৰু সাংস্কৃতিক গৌৰৱৰ দিশে আগবঢ়াই আহিছে। বিশিষ্ট অতিথি প্ৰবীণ ৰাজখোৱা, যি ভূপেন দাৰ সানিধ্য লাভ কৰিছিল তেওঁ ভূপেন হাজৰিকাৰ সৃষ্টিশীল জীৱনৰ ওপৰত এক বিশদ ভাষণ প্ৰদান কৰে। তেওঁ কয় যে সুধাকণ্ঠ ডঃ ভূপেন হাজৰিকাই অসমৰ সংগীত, সাহিত্য আৰু লোক-সাংস্কৃতি, ঐতিহ্যক বিশ্বমঞ্চত আগবঢ়াই লৈ গৈছিল। বিশিষ্ট অতিথিসকল আৰু অংশগ্ৰহণকাৰী ছাত্র-ছাত্ৰীৰ উপৰিও এই অনুষ্ঠানত সম-জিলা প্রশাসনৰ সকলো চৰকাৰী কৰ্মচাৰী, বিশিষ্ট নাগৰিক, গন্য মান্য ব্যক্তি, শিক্ষাবিদ আৰু স্থানীয় বাসিন্দাসকলে অংশগ্ৰহণ কৰে। দিনটোত সুধাকণ্ঠ ডঃ ভূপেন হাজৰিকাৰ প্ৰতি জনসাধাৰণৰ গভীৰ সন্মান, শ্রদ্ধা আৰু আন্তৰিক ভালপোৱাৰ প্ৰতিফলন ঘটে। তেওঁৰ অমৰ গীতসমূহে সমাজত চিৰকাল ঐক্য, সহানুভূতি আৰু শান্তিৰ পথত অনুপ্ৰাণিত কৰি যাব। অন্যহাতে দিনজোৰা কাৰ্য্যসূচীৰে মাৰ্ঘেৰিটা সুধাকন্ঠ স্মৃতি সুৰক্ষা সমিতি উদ্যোগত মাৰ্ঘেৰিটা জয়নাগৰস্থিত সুধাকন্ঠ পূৰ্ণাঙ্গ প্ৰতিমূৰ্তি স্থাপন স্থলীত সুধাকণ্ঠৰ মৃত্যুৰ দিনটো “স্মৃতি দিৱস” ৰূপে উদযাপন কৰে। পুৱা প্ৰতিমূৰ্তি বন্তি প্ৰজ্বলনে আৰু শ্ৰদ্ধাঞ্জলিৰে শুভাৰম্ভ কৰা অনুষ্ঠানত এখন স্মাৰক গ্ৰন্থও উন্মোচন কৰা হয়। সম্পাদক পবিত্ৰ বৰগোহাঞিয়ে আঁত ধৰা মুকলি সভাত নিদিষ্ট বক্তা হিচাপে উপস্থি থাকে ড° ভূপেন হাজৰিকৰ গীতৰ গৱেষক তথা অধ্যাপক ধেমাজী বাণিজ্য মহাবিদ্যালয়ৰ ড° শঙ্কৰ পাটোৱাৰী। কথা সুৰ কবিতা ভূপেন্দ্ৰ স্মৰণ অনুষ্ঠানৰ সঞ্চালনা কৰে ডিগবৈ মহাবিদ্যালয়ৰ অধ্যক্ষ ড° পবিত্ৰ 
ভৰালী। সভাত অতিথি হিচাপে উপস্থিত থাকে মাৰ্ঘেৰিটাৰ বিধায়ক ভাস্কৰ শৰ্মা, মাৰ্ঘেৰিটা পাব্লিক উচ্চতৰ মাধ্যমিক বিদ্যালয়ৰ অৱসৰপ্ৰাপ্ত অধ্যক্ষ বৰুণ বৰা, লিডু মহাবিদ্যাৰ অধ্যক্ষ ড° কৃপা প্ৰসাদ উপাধ্যায়, জিলা সাংবাদিক সংস্থাৰ সম্পাদক ৰাণাজ্যোতি নেওগ সহ বহুকেইগৰাকী গণ্যমান্য ব্যক্তি। সন্ধিয়া মাৰ্ঘেৰিটা আঞ্চলিক ছাত্ৰ সন্থাৰ উদ্যোগত মাৰ্ঘেৰিটা ৰঙ্গমঞ্চস্থিত শ্বহীদ বেদীৰ সমীপত সুধাকণ্ঠৰ প্ৰতিচ্ছবিত আছুৰ মাৰ্ঘেৰিটা আঞ্চলিক বিষয়ববীয়া সকলৰ উপস্থিত শ্ৰদ্ধাঞ্জলি অনুষ্ঠান অনুষ্ঠিত হয়। অন্যহাতে লিডুতো গণমঞ্চ লিডুত সৌজন্যত লিডু শাখা সাহিত্য সভা আৰু ঐক্যতান সাংস্কৃতিক গোষ্ঠীৰ উদ্যোগতো সুধাকণ্ঠক স্মৰণ কৰা হয়। লেখাপানী , জাগুন আদি অঞ্চলটোত দল সংগঠনৰ উদ্যোগত ভূপেন দা স্মৃতিস্মৰণ কৰা হয়।