ডিব্ৰুগড়ৰ থানা চাৰিআলিত আবেগ-অনুভূতিৰে ‘জুবিন দিৱস’ পালন
গীতে-মাতে প্ৰাণৰ শিল্পীক স্মৰণ; উচিত ন্যায়ৰ দাবীত ঐক্যবদ্ধ ডিব্ৰুগড়বাসী
জ্যোতি কানৈক বিশেষ সম্বৰ্ধনা
চাইন অন ডেস্ক,২০ছেপ্টেম্বৰঃ
অসমৰ প্ৰাণৰ শিল্পী জুবিন গাৰ্গৰ স্মৃতি সজীৱ কৰি ৰখাৰ উদ্দেশ্যে বৃহত্তৰ ডিব্ৰুগড় প্ৰেছ ক্লাব, ডিব্ৰুগড় যুৱ সমাজ আৰু ডিব্ৰুগড় সাহিত্য সভাৰ উদ্যোগত শুকুৰবাৰে ডিব্ৰুগড়ৰ থানা চাৰিআলিত সন্ধিয়াৰ পৰা নিশালৈকে বিভিন্ন কাৰ্যসূচীৰে ‘জুবিন দিৱস’ পালন কৰা হয়। গীতে-মাতে, নৃত্য-গীতে আৰু স্মৃতি ৰোমন্থনেৰে মুখৰ হৈ পৰে থানা চাৰিআলি। অনুষ্ঠানত বৃহৎসংখ্যক ডিব্ৰুগড়বাসীয়ে অংশগ্ৰহণ কৰি প্ৰাণৰ শিল্পীগৰাকীক শ্ৰদ্ধাঞ্জলি জ্ঞাপন কৰে।
অনুষ্ঠানৰ আৰম্ভণিতে জুবিন গাৰ্গৰ প্ৰতিচ্ছবিত বন্তি প্ৰজ্বলন কৰে বাদ্যযন্ত্ৰী তথা জুবিন গাৰ্গৰ সৈতে একাধিক অনুষ্ঠানত মঞ্চত বাদ্য সংগত কৰা চান্তো কাকতিয়ে। বন্তি প্ৰজ্বলনৰ পাছতে জুবিনৰ 
সৈতে থকা সান্নিধ্য আৰু সংগীতৰ স্মৃতি ৰোমন্থন কৰি চান্তো কাকতিয়ে ছেক্সোফোনত জুবিনৰ জনপ্ৰিয় ‘মায়াবিনী’ গীতৰ সুৰ পৰিৱেশন কৰে। তেওঁৰ এই পৰিৱেশনে উপস্থিত ৰাইজৰ মাজত সৃষ্টি কৰে এক আবেগিক পৰিৱেশ।
ইয়াৰ পাছতে অনুষ্ঠানৰ মঞ্চ উদ্বোধন কৰে অসম পৰ্যটন উন্নয়ন নিগমৰ অধ্যক্ষ ঋতুপৰ্ণ বৰুৱাই। উদ্বোধনী ভাষণত তেওঁ জুবিন গাৰ্গৰ অসমৰ সংগীত আৰু সাংস্কৃতিক ক্ষেত্ৰলৈ আগবঢ়োৱা অৱদান স্মৰণ কৰাৰ লগতে শিল্পীগৰাকীৰ মৃত্যুৰ ঘটনাৰ ক্ষেত্ৰত উচিত ন্যায়ৰ প্ৰয়োজনীয়তাৰ বিষয়েও মন্তব্য কৰে।
অনুষ্ঠানত ডিব্ৰুগড় জিলা সাংস্কৃতিক উন্নয়ন বিষয়া সুদৰ্শন বৰাই উপস্থিত থাকি বক্তব্য প্ৰদান কৰে। লগতে জ্যেষ্ঠ সাংবাদিক ৰণ দুৱৰা, ডিব্ৰুগড় সাহিত্য সভাৰ সভাপতি জ্যোতি বৰগোহাঁই, বৃহত্তৰ ডিব্ৰুগড় প্ৰেছ ক্লাবৰ কাৰ্যকৰী সভাপতি বিভাস দুৱৰা,ডিব্ৰুগড় যুৱ সমাজৰ সভাপতি খগেন দত্ত, সম্পাদক টমাচ বুঢ়াগোহাঁই, ডিব্ৰুগড় আছুৰ উপদেষ্টা পাপু শইকীয়াকে ধৰি কেইবাগৰাকীও বিশিষ্ট ব্যক্তি উপস্থিত থাকে।
ইয়াৰ পাছতে ডিবৰু লোক সাংস্কৃতিক কেন্দ্ৰৰ দিহানাম দলে জিতেন দাসৰ পৰিচালনাত দিহানাম পৰিৱেশন কৰে। মুৰ্চনা সংগীত বিদ্যালয়ৰ শিক্ষাৰ্থীসকলে ভুৱন গগৈৰ পৰিচালনাত ‘কলীয়া ডাৱৰে ঢাকিছে ৰূপহী জোনৰে মুখখনি’ শীৰ্ষক সমবেত সংগীত পৰিৱেশন কৰে। আনহাতে নৃত্যাংগণ কলা কেন্দ্ৰৰ শিক্ষাৰ্থীসকলে ৰুবী গগৈ সন্দিকৈৰ পৰিচালনাত ‘কেওঁ ফালে গুজৰি-গোমৰি আহিলে বান’ গীতত নৃত্য পৰিৱেশন কৰে।
শিশু শিল্পী অনচ্ প্ৰতীম বুঢ়াগোহাঁইয়ে ‘যদি জীৱনৰ ৰং গীত’ পৰিৱেশন কৰি উপস্থিত ৰাইজৰ মন জয় কৰে। কেছিঅ’ত জুবিনৰ গীতৰ সুৰ সমলয় তুলি ধৰি মুৰ্চনা সংগীত বিদ্যালয়ৰ শিক্ষাৰ্থীসকলে ‘মুকুটা মুকুটা’ আৰু ‘দিয়া ঘূৰাই দিয়া’ আদি গীত পৰিৱেশন কৰে।
অনুষ্ঠানৰ অন্যতম উল্লেখযোগ্য কাৰ্যসূচী আছিল বৃহত্তৰ ডিব্ৰুগড় প্ৰেছ ক্লাবৰ সম্বৰ্ধনা অনুষ্ঠান। প্ৰেছ ক্লাবৰ সম্পাদক ৰাতুল বুঢ়াগোহাঁইয়ে আঁত ধৰা এই অনুষ্ঠানত সভাপতি মনজিৎ বৰাই ভাষণ প্ৰদান কৰে। সমাজলৈ আগবঢ়োৱা অৱদানৰ বাবে সমাজকৰ্মী জ্যোতি প্ৰসাদ কানৈক বৃহত্তৰ ডিব্ৰুগড় প্ৰেছ ক্লাবৰ তৰফৰ পৰা ফুলাম গামোচা, চেলেং, প্ৰশস্তি পত্ৰ আৰু ফুলাম জাপিৰে বিশেষ সম্বৰ্ধনা জনোৱা হয়।
ইয়াৰ পাছতে ডিব্ৰু লোক সাংস্কৃতিক কেন্দ্ৰৰ শিক্ষাৰ্থীসকলে নৃত্য পৰিৱেশন কৰে। মুৰ্চনা সংগীত বিদ্যালয়ৰ অভিভাৱিকা আৰু সাহিত্য সভাৰ সদস্যসকলে কেইবাগৰাকীও শিল্পীৰ সহযোগত ‘প্ৰাণৰ মাধুৰী বুটলি বুটলি’ শীৰ্ষক সমবেত সংগীত পৰিৱেশন কৰে। জুবিনৰ জনপ্ৰিয় ‘অন্ধ আকাশ ৰূদ্ধ বতাহ’ গীতত নৃত্যাংগণ কলা কেন্দ্ৰৰ শিক্ষাৰ্থীসকলৰ নৃত্যয়ো অনুষ্ঠানৰ সৌন্দৰ্য বৃদ্ধি কৰে।
ইয়াৰ উপৰি শিশু শিল্পী তৃৰ্ষাদশী গগৈৰ গীত, ডিব্ৰু লোক সাংস্কৃতিক কেন্দ্ৰৰ শিক্ষাৰ্থীসকলৰ বাঁহীত ‘মায়াবিনী’ গীতৰ সুৰ আৰু জুবিন গাৰ্গৰ সৈতে গীত পৰিৱেশন কৰা জনপ্ৰিয় কণ্ঠশিল্পী জুপিতৰা 
কাকতিৰ গীতে অনুষ্ঠানৰ পৰিৱেশ অধিক আবেগিক কৰি তোলে।
বিশেষ আকৰ্ষণ হিচাপে জনপ্ৰিয় কণ্ঠশিল্পী পম্পী পূৰৱীয়ে গীতৰ শৰাই আগবঢ়ায়। আনহাতে, ইণ্ডিয়ান আইডলত জুবিন গাৰ্গৰ গীত পৰিৱেশন কৰা শিশু শিল্পী জেনিফা আহমেদে গীত পৰিৱেশন কৰি অনুষ্ঠানৰ পৰিৱেশ জীপাল কৰি তোলে।
সন্ধিয়াৰ পৰা নিশালৈকে চলা ‘জুবিন দিৱস’ত থানা চাৰিআলিত ডিব্ৰুগড়ৰ বিভিন্ন প্ৰান্তৰ পৰা অহা অগণন লোকৰ সমাগম ঘটে। অনুষ্ঠানৰ শেষ পৰ্যায়ত উপস্থিত ৰাইজে সমস্বৰে ‘মায়াবিনী’ গীত পৰিৱেশন কৰি জুবিন গাৰ্গৰ প্ৰতি শ্ৰদ্ধা নিবেদন কৰাৰ লগতে তেওঁৰ মৃত্যুৰ উচিত ন্যায়ৰ দাবী উত্থাপন কৰে।
জুবিনৰ গীত, সুৰ আৰু স্মৃতিৰে মুখৰ হৈ পৰা এই অনুষ্ঠানৰ জৰিয়তে ডিব্ৰুগড়বাসীয়ে পুনৰ এবাৰ প্ৰিয় শিল্পীগৰাকীৰ প্ৰতি থকা গভীৰ ভালপোৱা আৰু শ্ৰদ্ধা প্ৰকাশ কৰে। জুবিন শাৰীৰিকভাৱে নাথাকিলেও তেওঁৰ সৃষ্টি, সুৰ আৰু গান অসমৰ জনমানসত সদায় জীয়াই থাকিব—এই অনুভূতিৰে সামৰণি পৰে ‘জুবিন দিৱস’ৰ।