গোলকগঞ্জত একে দিনাই দুই কিশোৰীৰ আত্মহত্যা অঞ্চলজুৰি চাঞ্চল্য
ঘটনাৰ আঁৰত প্ৰেমজনিত কাৰণৰ সন্দেহ !
আগমনি,২৬আগষ্ট:
ধুবুৰী জিলাৰ গোলকগঞ্জত একে দিনাই দুগৰাকী কিশোৰীয়ে আত্মহত্যা কৰা ঘটনাই সমগ্ৰ অঞ্চলটোত তীব্ৰ চাঞ্চল্যৰ সৃষ্টি কৰিছে। দুয়োটা ঘটনাৰ আঁৰত প্ৰেমজনিত কাৰণ জড়িত থকাৰ সন্দেহ প্ৰকাশ কৰা হৈছে যদিও আত্মহত্যাৰ প্ৰকৃত কাৰণ এতিয়াও স্পষ্ট হোৱা নাই। জানিব পৰা মতে, প্ৰথমটো ঘটনা সংঘটিত হয় গোলকগঞ্জ আৰক্ষী থানাৰ অন্তৰ্গত মাঝেৰচৰ অঞ্চলত। 
অঞ্চলটোৰ আসান আলীৰ ১৭ বছৰীয়া কন্যা জয়নব খাতুনে নিজ বাসগৃহত আত্মহত্যা কৰে। অভিযোগ মতে, কিছুদিন পূৰ্বে কিশোৰীগৰাকী এজন যুৱকৰ সৈতে পলায়ন কৰিছিল। পিছত বিষয়টোক লৈ দুয়ো পক্ষৰ মাজত গাঁৱতে বৈঠক অনুষ্ঠিত হৈ মীমাংসা কৰে । যুৱকজনৰ
পৰিয়ালৰ পৰা মোটা অংকৰ ধন লোৱাৰ লগতে কিশোৰীগৰাকীক আন ঠাইত বিয়া দিয়াৰ কথা-বতৰা চলি থকা বুলি অভিযোগ উত্থাপিত হৈছে। এই পৰিস্থিতিৰ বাবেই কিশোৰীগৰাকীয়ে চৰম সিদ্ধান্ত লোৱা বুলি সন্দেহ কৰা হৈছে। ইফালে, একে দিনাই বিয়লি প্ৰায় ৪ বজাত গোলকগঞ্জৰ মৰাকুৰা গাঁৱত সংঘটিত হয় আনটো ঘটনা। গাঁওখনৰ দিলীপ ৰায়ৰ ১৬ বছৰীয়া কন্যা নমিতা ৰায়ে আত্মহত্যা কৰে। নমিতাৰ ক্ষেত্ৰতো প্ৰেমজনিত বিষয়ৰ বাবেই এই চৰম পথ বাছি লোৱাৰ সন্দেহ কৰা হৈছে। ইতিমধ্যে গোলকগঞ্জ আৰক্ষীয়ে দুয়োটা ঘটনা সন্দৰ্ভত তদন্ত আৰম্ভ কৰিছে।