অৰুণাচলৰ টাকচিঙত ভাৰতীয় সেনা আৰু চীনা পিএলএ-ৰ মুখামুখি অৱস্থান !
অস্থিৰ ভাৰত-চীন সীমান্তবৰ্তী ?
চাইন অন ডেস্ক,৬আগষ্ট:
অৰুণাচল প্ৰদেশৰ আন্তৰ্জাতিক সীমান্তত ভাৰতীয় সেনা আৰু চীনৰ সেনাই মুখামুখি অৱস্থান কৰাৰ এক তথ্য পোৱা গৈছে।এই সন্দৰ্ভত ইতিমধ্যেই দুটাকৈ ভিডিঅ’ আৰু ভালেসংখ্যক ফটো ভাইৰেল হৈ পৰাত বিষয়টোৱে গভীৰ উদ্বেগৰ স্বৃষ্টি কৰিছে।অৰুনাচলৰ আপাৰ সোৱণশিৰি জিলাৰ টাকচিঙ চাৰ্কোলত ভাৰতীয় সেনা আৰু চীনা সৈন্য(PLA)-ৰ মাজত মুখামুখি অৱস্থান কৰি পৰৱৰ্তীকালত কি পৰিস্থিতিৰ উদ্ভৱ হল,সেয়া এতিয়াও বিশদভাবে জানিব পৰা হোৱা নাই।এক উচ্চ পৰ্যায়ৰ সূত্ৰৰ দাবী অনুসৰি, এই মুখামুখি পৰিস্থিতি যোৱা ২৫ জুলাইৰ পৰা এতিয়ালৈকে অব্যাহত আছে।যদিও এতিয়ালৈকে এই দাবীৰ কোনো আনুষ্ঠানিক নিশ্চিতকৰণ হোৱা নাই।উল্লেখযোগ্য যে, ইয়াৰ পূৰ্বে ভাৰতীয় সেনা, অৰুণাচল প্ৰদেশ চৰকাৰ আৰু ৰাজ্যৰ গৃহমন্ত্ৰী মামা নাটুংয়ে টাকচিন অঞ্চলত চীনা সেনাৰ কোনো ধৰণৰ কাৰ্যকলাপ থকাৰ অভিযোগ অস্বীকাৰ কৰিছিল।কিন্তু শেহতীয়াকৈ পোহৰলৈ অহা কিছুমান ফটো আৰু ভিডিঅ’ই চৰকাৰী দাবীৰ ওপৰত নতুনকৈ কিছু প্ৰশ্ন উত্থাপন কৰিছে।আনহাতে
এই ঘটনাক কেন্দ্ৰ কৰি সীমান্ত অঞ্চলৰ সামগ্ৰিক পৰিস্থিতিৰ ওপৰত পুনৰ উদ্বেগ বৃদ্ধি পাইছে। এতিয়ালৈকে ভাৰতীয় সেনা বা কেন্দ্ৰীয় চৰকাৰৰ ফালৰ পৰা এই অভিযোগ সম্পৰ্কে কোনো আনুষ্ঠানিক বিবৃতি প্ৰকাশ কৰা হোৱা নাই।
ইফালে, ইয়াৰ বিস্ফোৰক তথ্যসম্বলিত এখন পত্র যোৱা ২৬ জুনত আপাৰ সোৱণশিৰি জিলাৰ উপায়ুক্তক প্রদান কৰিছিল অৰুণাচল প্রদেশৰ নাগৰিক সমাজৰ এটা সংগঠন নাহ ৱেলফেয়াৰ ছচাইটিয়ে।য’ত চীনৰ আগ্রাসনৰ বিৰুদ্ধে কেন্দ্র-ৰাজ্য চৰকাৰৰ তাৎক্ষণিক হস্তক্ষেপৰ ক্ষেত্রত জিলা উপায়ুক্তক পদক্ষেপ গ্রহণ কৰিবলৈ দাবী জনোৱা হৈছিল।পত্ৰখনত উল্লেখ কৰা অনুসৰি অৰুণাচল প্রদেশৰ টাকছিং চার্কোলৰ অন্তর্গত সীমান্তবর্তী কেতবোৰ নতুন আৰু গুৰুত্বপূর্ণ স্থান বেদখল কৰি চীনে অতি দ্রুতগতিৰে সম্প্ৰসাৰিত কৰিছে নিজৰ ভূখণ্ড। বেদখলকৃত এনে কেতবোৰ স্থানত ইতিমধ্যে ড্রেগন বাহিনীয়ে সামৰিক ঘাটি স্থাপন কৰাৰ লগতে পথ-দলঙো নির্মাণ কৰিছে।এই বিষয়টো উনুকিয়াই পত্রখনত অতি স্পষ্টভাবে লিখা হৈছিল যে আমাৰ পৈতৃক ভুমি য’ত আমি মাত্র কেইটামান বছৰ আগলৈকে অবাধে বিচৰণ কৰিছিলোঁ, চিকাৰ কৰিছিলোঁ আৰু বনজ সম্পদ সংগ্রহ কৰিছিলোঁ। সেই অঞ্চলসমূহ সম্প্রতি চীনৰ সৈন্য বাহিনী পিএলএৰ দখলত। বিশেষকৈ বিগত ১০-১৫ বছৰত সীমান্তবর্তী এলেকাত পিএলএৰ কার্যকলাপ বৃদ্ধি হৈছে বুলি এনডব্লিউএছে উল্লেখ কৰিছিল। এনে অৱস্থাত পিএলএৰ শেহতীয়া তৎপৰতাৰ লগে লগে ভাৰতে আৰু অধিক ভূখণ্ড হেৰুৱাব বুলিও সংগঠনটোৱে আশংকা ব্যক্ত কৰে পত্র খনত।এই প্রসংগতে এটা গুৰুত্বপূর্ণ স্থানৰ বিষয়ে বিশেষভাবে উল্লেখ কৰা হৈছিল। এইকেইটা হ’ল-টাকছিং সদৰৰ সমীপৱর্তী আমাফিলাৰ অয়িং-টুজলটাৰ, পানিয়াক-
মানানাফেৰ মাৰগান-পেট্টনাং হ্রদ-টিনডিংটাও টিজি। অভিযোগ অনুসৰি ২০২০ চনৰ আগলৈকে উক্ত স্থান কেইটা ভাৰত ভূখণ্ডৰ অধীনতেই আছিল। কিন্তু এতিয়া পিএলএই দখল কৰি লোৱাৰ সমান্তৰালভাবে তাত সামৰিক ঘাটি স্থাপন আৰু পথ-দলং নির্মাণ কৰিছে। তদুপৰি পৱিত্র তীর্থস্থান থকা চাৰি অঞ্চলৰ কেতবোৰ স্থানো বেদখল কৰিছে চীনে। আটাইতকৈ গুৰুত্বপূর্ণ কথাটো হ’ল চীনৰ ভূখণ্ড সম্প্রসাৰণ তথা বেদখলৰ পৰিণতিত সীমান্তবর্তী অঞ্চলত বসবাস কৰা স্থানীয় জনগোষ্ঠীৰ জীৱন আৰু নিৰাপত্তালৈ ভাবুকি নামি আহিব পাবে বুলি পত্রখনত আশংকা ব্যক্ত কৰা হৈছিল।এনে অৱস্থাত নাগৰিক সংগঠনটোৱে চীনৰ কার্যকলাপ অব্যাহত থাকিলে স্থানীয় লোকসকলৰ জীবিকা আৰু পৰম্পৰাগত যাতায়াতৰ ওপৰত বিৰূপ প্রভাব পৰিব বুলি সতর্ক কৰিও দিছিল। পত্রখনত লিখা হৈছিল যে টাকছিংত পিএলএৰ কার্যকলাপৰ উদ্দেশ্য আৰু গতিবিধি অত্যন্ত ভাবুকিপূর্ণ আৰু গভীৰ চিন্তাব বিষয়। আমি তেওঁলোকৰ বাবে প্রতিদিনে ইঞ্চি ইঞ্চিকৈ ভূমি হেৰুৱাইছোঁ। স্থানীয় জনগোষ্ঠীসমূহে প্রজন্মৰ পিছত প্রজন্ম ধৰি ব্যৱহাৰ কৰা পূর্বপুৰুষৰ চিকাৰথলী আৰু গো-চৰণীয়া
পথাৰসমূহ এতিয়া পিএলএই দখল কৰিছে। লক্ষণীয়ভাবে ভাৰতীয় সেনাবাহিনীৰ প্রতি এনডব্লিউএছে গভীৰ আস্থা ব্যক্ত কৰিছে যদিও পত্রখনত এক তাৎপর্যপূর্ণ বিষয় উল্লেখ কৰিছিল।কোৱা হৈছিল যে ভাৰতীয় সেনাৰ ওপৰত আমাৰ কোনো সন্দেহ নাই। আমাৰ সদায়ে তেওঁলোকৰ প্রতি বিশ্বাস আছে। তেওঁলোকে বহু বছৰ ধৰি আমাৰ ভুমিত পহৰা দি আছে। কিন্তু তেওঁলোকৰ এই পদক্ষেপ যথেষ্ট নহয়। সংগঠনটোৱে পত্রখনৰ সৈতে প্রমাণ হিচাপে কিছুসংখ্যক ফটো সংলগ্ন কৰিও দিছিল। এতিয়া পুনৰ আন্তৰ্জাতিক সীমান্তত,মেকমোহন লাইনৰ সমীপত পুনৰ ৰঙা চীনৰ সেনাৰ অবাধ সঞ্চালনে এক গভীৰ উদ্বেগৰ স্বৃষ্টি কৰিছে।