ডিব্ৰুগড় জিলা উপায়ুক্তৰ কাৰ্যালয়ৰ প্ৰৱেশদ্বাৰতে ভয়ানক লুণ্ঠন : ২৭ লাখ টকা মূল্যৰ সোণৰ চেইন লৈ পলায়ন কৰে চিলনী চোৰ
চাইন অন ডেস্ক,২২জুন:
ৰাজ্যৰ অন্যতম তথা বিশেষভাবে সুৰক্ষিত বুলি বিবেচিত ডিব্ৰুগড় জিলা উপায়ুক্তৰ কাৰ্যালয়ৰ প্ৰৱেশদ্বাৰতে কালি দিনদুপৰতে সংঘটিত হ’ল এক চাঞ্চল্যকৰ লুণ্ঠন কাণ্ড।যি কাণ্ডই সমগ্ৰ নিৰাপত্তা ব্যৱস্থাটোকে ভেঙুচালি কৰা যেন 
অনুমান হয়।সদায়েই আৰক্ষী আৰু নিৰাপত্তাৰক্ষীয়ে গিজগিজাই থকাৰ মাজতেই দুৰ্বৃত্তই এগৰাকী ব্যক্তিৰ ডিঙিৰ পৰা দুডাল প্ৰায় ১৮ তোলা ওজনৰ বহুমূলীয়া সোণৰ চেইন কাঢ়ি লৈ পলায়ন কৰাৰ ঘটনাই সমগ্ৰ অঞ্চলজুৰি তীব্ৰ চাঞ্চল্যৰ সৃষ্টি কৰিছে।আনকি,এই ঘটনাই সকলোৰে চকু কপালত তুলিছে।জানিব পৰা মতে, ভুক্তভোগী ব্যক্তি লাহোৱালৰ মদাৰখাট নিবাসী হৃষীকেশ গোস্বামীয়ে
কোনো ব্যক্তিগত কামত তেওঁ এখন অটোৰে জিলা আয়ুক্তৰ কাৰ্যালয়লৈ আহিছিল আৰু অ’টৰ পৰা নামি কাৰ্যালয়ৰ দুৱাৰ মুখৰ চিৰি বগাই ওপৰলৈ উঠিবলৈ লওঁতেই আগতীয়াকৈ খাপ পাতি থকা পালচাৰ বাইকত অহা দুটা চিলনী চোৰে অতৰ্কিতে তেওঁক লক্ষ্য কৰি আক্ৰমণ চলায়।বাইকত অহা দুৰ্বৃত্ত দুটাই সম্পূৰ্ণ মাস্ক পৰিহিত হেলমেট পৰিধান কৰিছিল।এটা দুৰ্বৃত্তই, গোস্বামীক থেলা মাৰি মুহূৰ্তৰ ভিতৰতে ডিঙিৰ পৰা সোণৰ চেইন কাঢ়ি লৈ ঘটনাস্থলীৰ পৰা তীব্ৰ গতিত বাইকৰে পলায়ন কৰে।এই ঘটনাত,গোস্বামী কিছু পৰিমানে হাত আৰু ডিঙিত আঘাতপ্ৰাপ্ত হয়।
আজি সংঘটিত এই লুণ্ঠিত সোণৰ চেইন দুডালৰ আনুমানিক বজাৰ মূল্য প্ৰায় ২৭ লাখ টকা বুলি জানিব পৰা গৈছে।
উল্লেখযোগ্য যে, জিলা আয়ুক্তৰ কাৰ্যালয়ৰ দৰে অতি সংবেদনশীল আৰু সুৰক্ষিত এলেকাত এনে দু:সাহসিক অপৰাধ সংঘটিত হোৱাত জিলা প্ৰশাসন আৰু আৰক্ষীৰ নিৰাপত্তা ব্যৱস্থাক লৈ বিভিন্ন মহলত প্ৰশ্ন উত্থাপিত হৈছে।
ইতিমধ্যে ভুক্তভোগী হৃষীকেশ গোস্বামীয়ে এই ঘটনাৰ সন্দৰ্ভত মিলন নগৰ আৰক্ষী চকীত এজাহাৰ দাখিল কৰিছে। আৰক্ষীয়ে ঘটনাস্থলীৰ চিচিটিভি ফুটেজ সংগ্ৰহ কৰি তদন্ত আৰম্ভ কৰিছে। এতিয়া এই দুঃসাহসিক কাণ্ডত জড়িত দুৰ্বৃত্তক কিমান শীঘ্ৰে কৰায়ত্ত কৰিব পাৰি, সেয়া হৈ পৰিছে লক্ষ্যণীয়।