ডিব্ৰুগড় কানৈ বাণিজ্য মহাবিদ্যালয়ত মডেল ইউনাইটেড নেচনছ সন্মিলন সম্পন্ন
চাইন অন ডেস্ক,২৯এপ্ৰিল:
ডিব্ৰুগড় চহৰৰ বাণিজ্য শিক্ষাৰ অন্যতম অগ্ৰণী শিক্ষানুষ্ঠান হনুমানবাক্স সুৰজমল কানৈ কমাৰ্চ কলেজত উদ্যমিতা কোষ, ছাত্ৰ একতা সভা আৰু বাণিজ্য বিভাগৰ যৌথ উদ্যোগত দুদিনীয়া কাৰ্যসূচীৰে মডেল ইউনাইটেড নেচনছ (MUN) সন্মিলন সফলভাৱে সম্পন্ন হয়। বিভিন্ন শিক্ষানুষ্ঠানৰ ছাত্ৰ-ছাত্ৰীৰ উৎসাহী অংশগ্ৰহণে মহাবিদ্যালয়ৰ প্ৰেক্ষাগৃহত অনুষ্ঠিত এই অনুষ্ঠানটোক বিশেষ মৰ্যাদা প্ৰদান কৰে।
২৫ এপ্ৰিলত অনুষ্ঠিত উদ্বোধনী অনুষ্ঠানত মহাবিদ্যালয়ৰ অধ্যক্ষ ড° জয়দেৱ গগৈয়ে বন্তি প্ৰজ্বলন কৰি কাৰ্যসূচীৰ শুভাৰম্ভ কৰে। এই অনুষ্ঠানত জেষ্ঠা অধ্যাপিকা তথা উদ্যমিতা কোষৰ সমন্বয়ক ড° তুলিকা মটক, ডিব্ৰুগড় 
বিশ্ববিদ্যালয়ৰ বাণিজ্য বিভাগৰ সহকাৰী অধ্যাপক ড° পংকজ চাহু আৰু ড° সম্ৰাট ভৰদ্বাজ বিশিষ্ট অতিথি হিচাপে উপস্থিত থাকে। অধ্যক্ষ ড° গগৈয়ে তেওঁৰ ভাষণত এই ধৰণৰ শৈক্ষিক কাৰ্যসূচীয়ে ছাত্ৰ-ছাত্ৰীৰ নেতৃত্ব গুণ, সমালোচনামূলক চিন্তাধাৰা আৰু কূটনৈতিক দক্ষতা বিকাশত সহায়ক বুলি উল্লেখ কৰে। আনহাতে অতিথিদ্বয়ে বিশ্বব্যাপী সমস্যা আৰু আলোচনা- প্ৰক্ৰিয়াৰ প্ৰয়োজনীয়তাৰ ওপৰত গুৰুত্ব আৰোপ কৰে।অনুষ্ঠানৰ সফল আয়োজনত সংগঠক মণ্ডলীৰ গুৰুত্বপূৰ্ণ ভূমিকা আছিল। ছাত্ৰ ইনচাৰ্জ হিচাপে আফ্ৰিদ হুছেইন আৰু দিপশিখা দাসে দায়িত্ব পালন কৰে। ডাইৰেক্টৰ জেনেৰেল তনুজ সোণোৱালে অনুষ্ঠানটো সুন্দৰকৈ পৰিচালনা কৰাৰ লগতে সাধাৰণ সম্পাদক প্ৰাচী দত্তই সমগ্ৰ কাৰ্যসূচীৰ তদাৰক কৰে। ইয়াৰ উপৰিও অর্চনা উপাধ্যায়, ৰাহুল যাদৱ ,গগনদীপ সিং,কৌশিক কমল দত্ত (লজিষ্টিক্স), সৌৰভ দে’ আৰু কুইন মেচ (প্ৰচাৰ), আক্লিম খান , উপদেষ্টা প্ৰভজীত সিং আৰু সম্পাদক আয়ুষ পালেও গুৰুত্বপূৰ্ণ অৱদান আগবঢ়ায়। উল্লেখযোগ্য যে, এইবাৰৰ MUN-ৰ প্ৰতিটো সমিতিৰ কাৰ্য্যবাহী বোৰ্ডৰ সদস্যসকল গুৱাহাটীৰ পৰা আহি অনুষ্ঠানটোক অধিক পেছাদাৰী ৰূপ প্ৰদান কৰে। সন্মিলনত IPC, UNGA-DISEC, UNHRC আৰু AIPPM আদি সমিতিত অংশগ্ৰহণকাৰীসকলে আন্তঃ ৰাষ্ট্ৰীয় বিষয়সমূহৰ ওপৰত গভীৰ আলোচনা কৰে। সামৰণী অনুষ্ঠানত প্ৰতিটো সমিতিৰ ভাল প্ৰদৰ্শন কৰা প্ৰতিযোগীসকলক পুৰস্কাৰেৰে সন্মানিত কৰা হয়।
IPC (Press) শাখাত ৰ’ণাক দেবে Best Delegate লাভ কৰাৰ লগতে অন্যান্য শাখা সমূহতো বহু প্ৰতিযোগীয়ে কৃতিত্ব প্ৰদৰ্শন কৰে। UNGA- DISEC, UNHRC আৰু AIPPM-তো বিভিন্ন প্ৰতিযোগীয়ে শ্ৰেষ্ঠতা অৰ্জন কৰে। আনহাতে IPC (Journalism) শাখাত মান্নত শৰ্মাই Best Journalist সন্মান লাভ কৰে। এইবাৰৰ সন্মিলনত “শ্ৰেষ্ঠ অনুষ্ঠান” সম্মান ডিব্ৰুগড়ৰ দিল্লী পাবলিক স্কুলে লাভ কৰে, যিয়ে সমগ্ৰ অনুষ্ঠানত উৎকৃষ্ট প্ৰদৰ্শনেৰে সকলোৰে দৃষ্টি আকৰ্ষণ কৰে। অনুষ্ঠানৰ সফল সম্পাদনত বিভিন্ন প্ৰতিষ্ঠান আৰু সংগঠনে সহায় আগবঢ়ায়। Banalata আৰু Epsilon Academy শীৰ্ষ পৃষ্ঠপোষক হিচাপে, Dilish আৰু Commercial Equipments House সহ-পৃষ্ঠপোষক হিচাপে আৰু Stitzzy Bronze Sponsor হিচাপে সহযোগিতা আগবঢ়ায়। ইয়াৰ উপৰিও Dibrugarh 24×7, Langdon Hotel & Restaurant আৰু JJM Hospital-এ মিডিয়া, খাদ্য আৰু আতিথ্য সহযোগী হিচাপে গুৰুত্বপূৰ্ণ ভূমিকা গ্ৰহণ কৰে। সামৰণী অনুষ্ঠানত সকলো বিজয়ীক সন্মান জনোৱা হয়। ইয়াৰ পিছতে অনুষ্ঠিত সাংস্কৃতিক সন্ধিয়াত “অনাবিল” নামৰ বেণ্ডে সংগীত পৰিবেশন কৰি উপস্থিত দৰ্শকক মুগ্ধ কৰে। আয়োজকসকলে অনুষ্ঠানটোৰ সফল সমাপনত সন্তোষ প্ৰকাশ কৰাৰ লগতে ভৱিষ্যতে এনেধৰণৰ শৈক্ষিক আৰু বৌদ্ধিক কাৰ্যসূচী অধিক বিস্তৃত পৰিসৰত আয়োজন কৰাৰ আশা ব্যক্ত কৰে। অনুষ্ঠানৰ দুয়োদিনৰ কাৰ্য্যসূচীতে মহাবিদ্যালয়ৰ ভালেসংখ্যক ছাত্ৰ ছাত্ৰী, কৰ্মচাৰী তথা শিক্ষক সকল উপস্থিত থাকে।