ডিব্ৰুগড়ত অসমৰ দ্বিতীয়খন বিধানসভা ভৱনৰ আধাৰশিলা স্থাপন অমিত শ্বাহৰ
চাইন অন ডেস্ক:
কেন্দ্ৰীয় গৃহমন্ত্ৰী অমিত শ্বাহে শুকুৰবাৰে ডিব্ৰুগড়ত অসমৰ দ্বিতীয়টো বিধানসভা কমপ্লেক্সৰ আধাৰশিলা স্থাপন কৰে। ডিব্ৰুগড় চহৰক অসমৰ দ্বিতীয় ৰাজধানী হিচাপে গঢ়ি তোলাৰ দিশত অগ্ৰসৰ হোৱাৰ সময়তে ৰাজ্যখনৰ আন্তঃগাঁথনি উন্নয়নৰ ক্ষেত্ৰত এয়া এক উল্লেখযোগ্য মাইলৰ খুঁটি হিচাপে বিবেচিত হৈছে।
২৫০ একৰ মাটিত বিস্তৃত এই উচ্চাভিলাষী ২৮৪ কোটি টকীয়া প্ৰকল্পটোত বিধানসভা ভৱন, বিধায়ক আৱাস, ৮০০ আসনযুক্ত এটা প্ৰেক্ষাগৃহ আৰু ৪৮০ জনীয়া এটা বেৰাক থাকিব। মুখ্যমন্ত্ৰী হিমন্ত বিশ্ব শৰ্মাই ২০২৫ চনত ডিব্ৰুগড়ৰ মৰ্যাদা বৃদ্ধিৰ বাবে কৰা ঘোষণাৰ পাৰিপাৰ্শ্বিকতাত এই কমপ্লেক্সটো ৩০ মাহৰ ভিতৰত সম্পূৰ্ণ কৰাৰ লক্ষ্য নিৰ্ধাৰণ কৰা হৈছে।
খনিকৰ খেলপথাৰত ভাষণ দি শ্বাহে বৰ্তমান আৰু অতীতৰ চৰকাৰৰ মাজত এক স্পষ্ট পাৰ্থক্য দাঙি ধৰে। তেওঁ কয়, “আমি আগতে দেখিছোঁ যে কংগ্ৰেছ চৰকাৰৰ ঘোষণাবোৰ কেৱল ঘোষণাতেই সীমাবদ্ধ আছিল। বিজেপি চৰকাৰে ঘোষণা কৰিছিল আৰু আজি অসমৰ দ্বিতীয়টো বিধানসভা কমপ্লেক্সৰ আধাৰশিলা স্থাপন কৰা হ’ল।” ডিব্ৰুগড়বাসীক “অসমৰ ৰাজধানী”ৰ ভৱিষ্যত বাসিন্দা হিচাপে তেওঁ অভিনন্দন জ্ঞাপন কৰে।
এই অনুষ্ঠানতে খনিকৰত ২৩৮ কোটি টকা ব্যয়ৰে নিৰ্মিত মাল্টি-ডিচিপ্লিনৰী স্পৰ্টছ কমপ্লেক্সৰ প্ৰথম পৰ্যায়ৰো উদ্বোধন কৰা হয়। এই ক্ৰীড়া প্ৰকল্পটোত ইনড’ৰ ষ্টেডিয়াম, ছুইমিং পুল কমপ্লেক্স, ফুটবল খেলপথাৰ, লন টেনিছ, ভলীবল আৰু বাস্কেটবল কোৰ্টৰ লগতে হোষ্টেলৰ সুবিধা আছে। ইয়াৰ উপৰিও শ্বাহে ২০৯ কোটি টকীয়া দ্বিতীয় পৰ্যায়ৰ আধাৰশিলাও স্থাপন কৰে, যিয়ে দৰ্শকৰ আসন ৫,০০০ ৰ পৰা ৩৫,০০০ লৈ বৃদ্ধি কৰি ইয়াক অসমৰ সৰ্ববৃহৎ ক্ৰীড়া কমপ্লেক্স হিচাপে গঢ়ি তুলিব।
তদুপৰি, শ্বাহে দিনজানত বৈজ্ঞানিক গৱেষণা আৰু বন্যপ্ৰাণী সুৰক্ষাৰ বাবে উৎসৰ্গিত ‘ইনষ্টিটিউট অৱ ৱাইল্ডলাইফ হেল্থ এণ্ড ৰিচাৰ্চ’ৰ ৰিম’টৰ জৰিয়তে আধাৰশিলা স্থাপন কৰাৰ লগতে ৰাষ্ট্ৰীয় দুৰ্যোগ প্ৰশমন পুঁজিৰ অধীনত ‘অসম জলাশয় পুনৰুদ্ধাৰ আৰ্হি’ (Assam’s Wetland Restoration Model) মুকলি কৰে।
স্পেচ এপ্লিকেচন চেণ্টাৰে কৰা উপগ্ৰহ জৰিপৰ ওপৰত ভিত্তি কৰি তৈয়াৰ কৰা এই জলাশয় আঁচনিৰ লক্ষ্য হৈছে ব্ৰহ্মপুত্ৰৰ বানপানীৰ পানী ১৫ টা পুনৰুজ্জীৱিত বিললৈ বোৱাই নিয়া। প্ৰাৰম্ভিক পৰ্যায়ত ৬৯২ কোটি টকা আৱণ্টনেৰে এই প্ৰকল্পটোৱে ব্ৰহ্মপুত্ৰৰ বানপানীৰ বাবে প্ৰাকৃতিক জলাধাৰ হিচাপে কাম কৰিবলৈ ১৫ টা প্ৰধান জলাশয়ক পুনৰুজ্জীৱিত কৰাৰ লক্ষ্য লৈছে।
গৃহমন্ত্ৰীগৰাকীয়ে কয়, “আমি বানমুক্ত অসমৰ প্ৰতিশ্ৰুতি দিছিলোঁ আৰু আজি আমি ইয়াৰ বৈজ্ঞানিক সমাধান আগবঢ়াইছোঁ। কেন্দ্ৰীয় গৃহ মন্ত্ৰালয়ে প্ৰথম পৰ্যায়ত ১৫ টা জলাশয় উন্নয়নৰ বাবে ৬৯২ কোটি টকা আৱণ্টন দিছে। এই ১৫ টা পুনৰুজ্জীৱিত বিললৈ পানী বোৱাই দি আমি ৭.৫ লাখ লোকক বানৰ পৰা ৰক্ষা কৰিম আৰু জমা কৰি থোৱা পানী ব্যৱহাৰ কৰি ৭৭,০০০ হেক্টৰ ভূমি জলসিঞ্চনৰ আওতালৈ আনি আমাৰ কৃষকসকলক বছৰত তিনিবাৰকৈ খেতি কৰাৰ সুবিধা দিম।”
শেহতীয়া ভাৰত-ইউৰোপীয় ইউনিয়নৰ মুক্ত বাণিজ্য চুক্তি (FTA) ৰ পৰা হ’বলগীয়া অৰ্থনৈতিক সুবিধাৰ ওপৰতো আলোকপাত কৰে গৃহমন্ত্ৰীগৰাকীয়ে। তেওঁ কয়, “এই এফটিএ (FTA) ৰ আটাইতকৈ ডাঙৰ লাভ ডিব্ৰুগড়ৰ হ’ব কাৰণ চাহ বাগানত উৎপাদিত চাহ কোনো শুল্ক নোহোৱাকৈ ইউৰোপীয় ইউনিয়নৰ ২৭ খন দেশত পাবগৈ। পেৰিছৰ পৰা বাৰ্লিনলৈ এতিয়া অসম চাহৰ সুগন্ধই বিশ্ব দৰবাৰত ভাৰতক প্ৰতিনিধিত্ব কৰিব।”