উত্তৰ প্ৰদেশত এক ভয়ংকৰ বিমান দুৰ্ঘটনা!
কাৰিকৰী বিজুতিৰ বাবে চহৰৰ মাজমজিয়াৰ পুখুৰীত পৰে
*প্ৰয়াগৰাজ:*
উত্তৰ প্ৰদেশৰ প্ৰয়াগৰাজ চহৰত আজি দিনদুপৰতে এক ভয়ংকৰ বিমান দুৰ্ঘটনা সংঘটিত হয়। ভাৰতীয় বায়ুসেনাৰ এখন সৰু প্ৰশিক্ষণ বিমান (Microlight Aircraft) কাৰিকৰী বিজুতিৰ বাবে চহৰৰ মাজমজিয়াৰ এটা পুখুৰীত পৰে। বিমানখনত থকা দুই পাইলটে পেৰাচুটৰ সহায়ত জপিয়াই কথমপি নিজৰ জীৱন ৰক্ষা কৰিবলৈ সক্ষম হয়।প্ৰাপ্ত খবৰ অনুসৰি, আজি দুপৰীয়া ১ বজাত প্ৰয়াগৰাজৰ বামৰৌলী বিমান বন্দৰৰ পৰা নিয়মীয়া উৰণৰ বাবে যাত্ৰা আৰম্ভ কৰিছিল বিমানখনে। উৰণৰ কিছু সময় পিছতেই বিমানখনৰ ইঞ্জিনত যান্ত্ৰিক বিজুতি ঘটে। চহৰৰ ঘন জনবসতিপূৰ্ণ এলেকাৰ ওপৰেৰে উৰি থকা অৱস্থাত বিমানখন দুৰ্ঘটনাগ্ৰস্ত হোৱাৰ উমান পাই পাইলট দুজনে অসীম বুদ্ধিমত্তাৰ পৰিচয় দিয়ে।
পাইলটদ্বয়ে বিমানখন লোকালয়ত পৰিবলৈ নিদি ওচৰতে থকা কেপি কলেজৰ পিছফালৰ এটা বৃহৎ পুখুৰী লক্ষ্য কৰি আগুৱাই লৈ যায় আৰু বিমানখন পানীত পৰাৰ পূৰ্বেই নিজকে সুৰক্ষিতভাৱে ‘ইজেক্ট’ কৰে।
বিমানখন পৰাৰ লগে লগে এক বিকট শব্দ শুনা যায়, যাৰ ফলত সমগ্ৰ অঞ্চলটোত আতংকৰ সৃষ্টি হয়। ৰকেট সদৃশ কিবা এটা আকাশৰ পৰা পুখুৰীত পৰা দেখি শ শ স্থানীয় লোক ঘটনাস্থলীত উপস্থিত হয়। স্থানীয় ৰাইজে তৎক্ষণাত পানীত পৰা পাইলট দুজনক উদ্ধাৰ কৰি পাৰলৈ লৈ আহে।
খবৰ পোৱাৰ কিছু সময়ৰ ভিতৰতে আৰক্ষী, এনডিআৰএফ (NDRF) আৰু বায়ুসেনাৰ এটা উদ্ধাৰকাৰী দল ঘটনাস্থলীত উপস্থিত হয়। আহত পাইলট দুজনক তাৎক্ষণিকভাৱে সামৰিক চিকিৎসালয়ত ভৰ্তি কৰা হৈছে। বৰ্তমান তেওঁলোকৰ অৱস্থা সুস্থিৰ বুলি জানিব পৰা গৈছে।
বায়ুসেনাৰ তৰফৰ পৰা জনোৱা হৈছে যে প্ৰশিক্ষণ বিমানখনৰ দুৰ্ঘটনাৰ প্ৰকৃত কাৰণ জানিবলৈ উচ্চস্তৰীয় তদন্তৰ নিৰ্দেশ দিয়া হৈছে। বৰ্তমান উদ্ধাৰকাৰী দলে পুখুৰীৰ মাজৰ পৰা বিমানখনৰ ধ্বংসাৱশেষ উদ্ধাৰ কৰাৰ প্ৰচেষ্টা অব্যাহত ৰাখিছে। পাইলটৰ তৎপৰতাৰ বাবেই চহৰৰ জনবসতিপূৰ্ণ এলেকাক এক বৃহৎ বিপদৰ পৰা ৰক্ষা কৰা বাবে স্থানীয় ৰাইজে তেওঁলোকক প্ৰশংসা কৰিছে।