বাংলাদেশত হিন্দু যুৱকৰ হত্যাৰ বিৰুদ্ধে ডিব্ৰুগড়ত VHP আৰু বজৰং দলৰ প্ৰতিবাদ
মুহাম্মদ ইউনুছৰ পুতলা দাহ, ন্যায়ৰ দাবী
চাইন অন ডেস্ক:
বাংলাদেশত এজন হিন্দু যুৱকৰ নৃশংস হত্যাৰ প্ৰতিবাদত আজি ডিব্ৰুগড়ত বিশ্ব হিন্দু পৰিষদ (VHP) আৰু বজৰং দলৰ কাৰ্যকৰ্তাসকলে বৃহৎ প্ৰতিবাদ কাৰ্যসূচী ৰূপায়ণ কৰে। এই উপলক্ষে বাং্লাদেশৰ অন্তৱৰ্তীকালীন প্ৰধানমন্ত্ৰী মুহাম্মদ ইউনুছৰ পুতলা দাহ কৰা হয়।
প্ৰতিবাদকাৰীসকলে বিশ্ব হিন্দু পৰিষদৰ জিলা কাৰ্যালয়ৰ পৰা ৰেলী উলিয়াই থানা চাৰিআলীলৈ যাত্ৰা কৰে। ৰেলীৰ সময়ছোৱাত ‘জয় শ্ৰী ৰাম’ ধ্বনি তোলা হয় আৰু বাংলাদেশ চৰকাৰৰ বিৰুদ্ধে শ্ল’গান দিয়া হয়। প্ৰতিবাদকাৰীসকলে অভিযোগ কৰে যে বাংলাদেশ চৰকাৰ হিন্দু সংখ্যালঘুসকলৰ সুৰক্ষা নিশ্চিত কৰিবলৈ সম্পূৰ্ণৰূপে ব্যৰ্থ হৈছে।
প্ৰতিবাদস্থলীত কাৰ্যকৰ্তাসকলে বাংলাদেশত নিহত হিন্দু যুৱক দীপু দাসৰ ন্যায় দাবী কৰাৰ লগতে সীমান্তৰ সিপাৰে সংখ্যালঘুসকলৰ ওপৰত চলি থকা হিংসা তৎক্ষণাৎ বন্ধ কৰাৰ দাবী জনায়। এই সময়ছোৱাত মুহাম্মদ ইউনুছৰ পুতলা দাহ কৰি নিজৰ ক্ষোভ প্ৰকাশ কৰে।
সভাত ভাষণ দি VHP-ৰ এজন সদস্যই কয়, “আজি আমি বাংলাদেশ চৰকাৰৰ বিৰুদ্ধে প্ৰতিবাদ ৰেলী উলিয়ালোঁ, কিয়নো তাত হিন্দু নাগৰিকসকলৰ সুৰক্ষা নিশ্চিত কৰা হোৱা নাই। এজন হিন্দু যুৱকক গছত বান্ধি জনসমূখত জীৱন্তভাৱে জ্বলাই হত্যা কৰা হৈছে। আমি এই অমানৱীয় ঘটনাৰ তীব্ৰ নিন্দা কৰোঁ।”তেওঁ লগতে অভিযোগ কৰে যে বাংলাদেশত উগ্ৰপন্থী উপাদানৰ প্ৰভাৱ বৃদ্ধি পাইছে আৰু চৰকাৰে তেওঁলোকৰ বিৰুদ্ধে কঠোৰ ব্যৱস্থা ল’বলৈ ব্যৰ্থ হৈছে।