কৰম পূজালৈ গৈ সন্ধানহীন ৯ বছৰীয়া শিশু

কৰম পূজালৈ গৈ সন্ধানহীন ৯ বছৰীয়া শিশু

১৭ ছেপ্টেম্বৰৰ নিশা উদ্ধাৰ শুক্লাই নৈৰ গাঁতত পুতি থোৱা অৱস্থাত মৃতদেহ উদ্ধাৰ

ধৰ্ষণ কৰি হত্যাৰ সন্দেহ ৰাইজৰ

ওদালগুৰি:

ওদালগুৰি জিলাৰ খাগ্ৰাবাৰীৰ নলবাৰীত সংঘটিত এক পৈশাচিক ঘটনাই জোকাৰিছে সমগ্ৰ অঞ্চলটো । বিগত দুই দিন ধৰি সন্ধানহীন হৈ থকা এগৰাকী কণমানিৰ মৃতদেহ নদীৰ বুকুত পুতি থোৱা অৱস্থাত উদ্ধাৰ হোৱা ঘটনাই এতিয়া চাঞ্চল্যৰ সৃষ্টি কৰিছে অঞ্চলটোত। কণমানি জনিৰ ধৰ্ষণ কৰি বৰ্বৰভাৱে হত্যা কৰাৰ সন্দেহ অঞ্চলবাসীৰ ৷
টংলা থানা ( ভেৰগাঁও আৰক্ষী চকী) ৰ অন্তৰ্গত ভেৰগাঁৱৰ নলবাৰী গাঁৱত সংঘটিত হৈছে এই বৰ্বৰ ঘটনা।

এটি আদিবাসী পৰিয়ালৰ কণমানি জিয়ৰীৰ লগত সংঘটিত এই ঘটনাক লৈ উত্তেজনাৰ সৃষ্টি হৈছে অঞ্চলটোত । টংলাত দুই কণমানি ছাত্ৰৰ ক্ষেত্ৰত সংঘটিত ডাৱল মাৰ্ডাৰৰ ঘটনাৰ পাছত সংঘটিত এই নাৰকীয় কাণ্ডই এতিয়া জোকাৰি গৈছে অঞ্চলটো। জানিব পৰা মতে বিগত ১৫ ছেপ্টেম্বৰত কৰম পূজা চাবলৈ ঘৰৰ পৰা ওলাই যোৱাৰ পিছৰে পৰা সন্ধানহীন হৈ আছিল কণমানি জনি । পৰিয়ালৰ লোকে ঘটনা সন্দৰ্ভত ভেৰগাঁও আৰক্ষী চকীত দাখিল কৰিছিল এজাহাৰ ।

যোৱা নিশা ওদালগুৰিৰ সীমামূৰীয়া তামুলপুৰ জিলাৰ নিধুৱাত শুক্লাই নৈৰ বুকুত গাঁতত পুতি থোৱা অবস্থাত উদ্ধাৰ হ’য় কণমানি জনিৰ মৃতদেহ । খাগ্ৰাবাৰীৰ নলবাৰীৰ ৰাজু কিষাণ আৰু অনিমা কিষাণৰ ৯ বছৰীয়া কন্যা সন্তানটিৰ মৃতদেহ উদ্ধাৰ হোৱাৰ পাছতে এয়া এক ধৰ্ষণৰ ঘটনা বুলি দাৱী কৰি স্থানীয় ৰাইজে দোষীক বিছাৰি উলিয়াই কঠোৰ শাস্তিৰ দাৱীত সৰৱ হৈ পৰে ।

ইফালে এই পৈশাচিক ঘটনাক লৈ সৰৱ হৈ পৰা দেখা গৈছে আদিবাসী ছাত্ৰ সন্থা আৰু নিখিল বড়ো ছাত্ৰ সন্থাৰ লগতে স্থানীয় ৰাইজৰ । নলবাৰী প্ৰাথমিক বিদ্যালয়ৰ তৃতীয় শ্ৰেণীৰ ছাত্ৰী গৰাকীৰ মৃতদেহ উদ্ধাৰৰ পিছতেই বিদ্যালয়ৰ প্ৰাঙ্গণত সদৌ অসম আদিবাসী ছাত্ৰ সন্থা আৰু খাগ্ৰাবাৰী আঞ্চলিক নিখিল বড়ো ছাত্ৰ সন্থাৰ লগতে স্থানীয় ৰাইজে আৰক্ষী প্ৰশাসনৰ লেহেমীয়া তদন্তক লৈ উত্তেজিত হৈ তীব্ৰ প্ৰতিবাদ সাব্যস্ত কৰে । অসম পুলিচ গ’ বেক, অসম আৰক্ষী হায়-হায় , ২৪ ঘণ্টাৰ ভিতৰত দোষীক কৰায়ত্ত কৰি ফাঁচী দিবলৈ তীব্ৰ প্ৰতিবাদ সাব্যস্ত কৰি উত্তাল পৰিৱেশৰ সৃষ্টি কৰে। সংগঠন কেইটাই দোষীক শীঘ্ৰে কৰায়ত্ব কৰি কঠোৰ শাস্তিৰ দাৱী তুলিছে। দোষীক কৰায়ত্ত নকৰা পৰ্যন্ত আছা ক্ষান্ত নহ’য় বুলি হুংকাৰ দি সংগঠনটোই তীব্ৰ আন্দোলন গঢ়ি তোলাৰ হুংকাৰ দিছে৷