এই কাৰ্যসূচীৰ পিছতে মুখ্য অতিথিৰ মনোজ্ঞ ভাষণ প্ৰদান কৰে অসম আৰক্ষীৰ জেষ্ঠ্য বিষয়া, সু-লেখক, অভিনেতা, চলচ্চিত্ৰ নিৰ্মাতা তথা সমাজকৰ্মী পাৰ্থ সাৰথি মহন্তই। ‘গুৰু’ ক ‘অন্ধকাৰ বিনাশক’ আখ্যা দি অতিথিগৰাকীয়ে কয় যে সাম্প্ৰতিক সমাজ ব্যৱস্থাত গুৰু শব্দৰ সেই পুৰাতন অভিধাক পুনৰ বিশ্লেষণৰ সময় আহি পৰিছে। সাম্প্ৰতিক সময়ত শিক্ষকতা এক প্ৰত্যাহ্বানলৈ পৰ্যৱসিত হোৱা বুলি উল্লেখ কৰি তেখেতে কয় যে আজিৰ শিক্ষকে পৰম্পৰা আৰু নতুনত্বৰ মাজত সামজ্যঞ্চ ৰক্ষা কৰি চলিবলৈ চেষ্টা কৰিব লাগিব।
আনহাতেদি , সন্মানীয় অতিথিৰ ভাষণত অসমৰ চলচ্চিত্ৰ জগতৰ অন্যতম পুৰোধা প্ৰাঞ্জল শইকীয়াই এক আদৰ্শগত জীৱন যাপনৰ পোষকতা কৰে আৰু এইক্ষেত্ৰত শিক্ষক আৰু ছাত্ৰ সমাজক বলিষ্ঠ ভূমিকা পালন কৰিবলৈ আহ্বান জনায়। তেখেতে কয় যে আমি কৰা কৰ্ম ৰাজিয়ে পিছৰ প্ৰজন্মক ক্ষতি কৰিব নালাগে। লগতে শ্ৰমবিহীন এটা জীৱন নকটাবলৈও সকলোৰে প্ৰতি তেখেতে আহ্বান জনায়।
উল্লেখ্য যে এই সভাতে ‘ ডিব্ৰুগড় বিশ্ববিদ্যালয় শিক্ষক বঁটা, ২০২৫’ আৰু ‘ উপেন্দ্ৰ নাথ গগৈ স্মাৰক শিক্ষক বঁটা ২০২৫’ প্ৰদান কৰা হয়। শিক্ষক সমাজৰ পৰা অহা আবেদনৰ ভিত্তিত তথা বিশেষজ্ঞ কমিটিৰ পৰামৰ্শ অনুসৰি ডিব্ৰুগড় বিশ্ববিদ্যালয়ৰ ভেষজ বিজ্ঞান বিভাগৰ সহকাৰী অধ্যাপক ড° হংস ৰাজ ভট্টক ‘উপেন্দ্ৰ নাথ গগৈ সোঁৱৰণী বঁটা’ আৰু ডিব্ৰুগড় বিশ্ববিদ্যালয়ৰ অধীনৰ সোনাৰী মহাবিদ্যালয়ৰ গণিত বিভাগৰ অধ্যাপক ড° কৌশিক দিহিঙীয়া আৰু ডিগবৈ মহিলা মহাবিদ্যালয়ৰ দৰ্শন বিভাগৰ অধ্যাপক ড° মানিক কোঁচক ‘ ডিব্ৰুগড় বিশ্ববিদ্যালয় শিক্ষক বঁটা ২০২৫ ‘ বঁটাৰে সন্মানিত কৰা হয়। এই বঁটাৰ লগত আছে একোটাকৈ নগদ ধনৰ টোপোলা, স্মাৰক আৰু একোখনকৈ প্ৰশস্তি পত্ৰ।
মনকৰিবলগীয়া যে এই অনুষ্ঠানত ডিব্ৰুগড় বিশ্ববিদ্যালয়ৰ সকলো বিভাগ আৰু অধ্যয়ন কেন্দ্ৰৰ শিক্ষক, গৱেষক, ছাত্ৰ-ছাত্ৰী আৰু বিষয়া-কৰ্মচাৰীৰ উপৰি একাংশ অতিথিও উপস্থিত থাকে।
