ডিব্ৰুগড়ত মুখ্যমন্ত্ৰী ড° হিমন্ত বিশ্ব শৰ্মাই

ডিব্ৰুগড়ত মুখ্যমন্ত্ৰী ড° হিমন্ত বিশ্ব শৰ্মাই
“ড° লীলা গগৈ” আৰু “বাগ্মীবৰ নীলমণি ফুকন” উৰণীয়া সেতু আজি কৰিব উদ্বোধন*

২৭ এপ্ৰিলৰ সন্ধিয়া ৰাজ্যৰ বাবে উৎসৰ্গিত কৰিব দুয়োখন উৰণীয়া সেতু

চাইন অন ডেক্সঃ

ঐতিহাসিক মহানগৰী ডিব্ৰুগড়ৰ আন্তঃগাঁথনিত এক উল্লেখযোগ্য সংযোজন হিচাপে মুখ্যমন্ত্ৰী ড° হিমন্ত বিশ্ব শৰ্মাই আজি অৰ্থাৎ ২৭ এপ্ৰিলৰ সন্ধিয়া দুখন গুৰুত্বপূৰ্ণ উৰণীয়া সেতু উদ্বোধন কৰিব।যিয়ে অসমৰ দ্বিতীয় ৰাজধানী হিচাপে গঢ় লৈ উঠা মহানগৰখনৰ বৰ্ধিত যান-জঁট সমস্যা লাঘৱ কৰাৰ দিশত এক গুৰুত্বপূৰ্ণ পদক্ষেপ ৰূপে চিহ্নিত হৈ ৰব।উল্লেখ্য যে কালিলৈ আনুষ্ঠানিকভাৱে শুভ উদ্বোধন কৰিব লগীয়া “ড° লীলা গগৈ উৰণীয়া সেতু” নামেৰে নামকৰণ কৰা কনভয় ৰোড উৰণীয়া সেতুৱে কনভয় ৰোডক ৩৭ নং ৰাষ্ট্ৰীয় ঘাইপথৰ সৈতে সংযোগ কৰিব। ৰাজ্যৰ অগ্ৰাধিকাৰ উন্নয়ন (SOPD-G) কাৰ্যসূচীৰ অধীনত ৪৯.২১ কোটি টকা ব্যয়েৰে নিৰ্মাণ কৰা ৯৩৮ মিটাৰ দৈৰ্ঘ্যৰ এই সেতুখন, ২০২১ চনৰ ১ অক্টোবৰ তাৰিখে মুখ্যমন্ত্ৰী ড° শৰ্মাই নিজেই আধাৰশিলা স্থাপন কৰা দিনৰে পৰা সমগ্ৰ ডিব্ৰুগড় বাসীয়ে আগ্ৰহেৰে অপেক্ষা কৰি আছিল।আনহাতেদি
একে সময়তে মুখ্যমন্ত্ৰীয়ে মহানগৰখনৰ থানা চাৰিআলিত “বাগ্মীবৰ নীলমণি ফুকন উৰণীয়া সেতু”ও উদ্বোধন কৰিব। ৬৯.৬৯ কোটি টকা ব্যয়েৰে নিৰ্মাণ কৰা ৪৫৮ মিটাৰ দৈৰ্ঘ্যৰ ৰেল উৰণীয়া সেতুখন ১৯৬৫ চনৰ পৰা থানা চাৰিআলিত বিদ্যমান হৈ আছিল।এই সেতুখনে মহানগৰখনৰ আন্তঃগাঁথনিৰ তৰান্বিত কৰাৰ ক্ষেত্ৰত অতি গুৰুত্বপূৰ্ণ ভূমিকা গ্ৰহণ কৰিব বুলিও সকলোৱেই আশা প্ৰকাশ কৰিছে।সেয়ে এই পুৰণি অভাৰব্ৰীজখন আধুনিকীকৰণ কৰাৰ অতি প্ৰয়োজন আছিল।ইফালে ডিব্ৰুগড় সাহিত্য সভাৰ লগতে অনান্য সংগঠনেও এই দুখন গুৰুত্বপূৰ্ণ অভাৰব্ৰীজৰ(উৰণীয়া সেতু) নামকৰণ অসমৰ দুজন মহান মনীষীৰ নামেৰে নামাংকিত কৰিবলৈ ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাক স্মাৰক পত্ৰৰ জৰিয়তে অনুৰোধ জনাইছিল। ড° লীলা গগৈ ৰাজ্যৰ শৈক্ষিক আৰু সাংস্কৃতিক পৰিসৰত এক বিশিষ্ট ব্যক্তিত্বৰে পৰিচিত আছিল। আনহাতে “বাগ্মীবৰ” হিচাপে জনাজাত নীলমণি ফুকন এজন বিখ্যাত সাহিত্যিক আছিল যিয়ে অসমীয়া সাহিত্য আৰু সংস্কৃতিলৈ উল্লেখযোগ্য অৱদান আগবঢ়াইছিল।অৱশেষত ৰাজ্যৰ মুখ্যমন্ত্ৰীয়ে এই দুটা নামেৰেই নামাংকিত কৰিবলৈ সিধান্ত গ্ৰহণ কৰে।ইফালে উদ্বোধনৰ পূৰ্বসন্ধ্যাত ডিব্ৰুগড়ৰ মেয়ৰ ডাঃ সৈকত পাত্ৰই এই আন্তঃগাঁথনি প্ৰকল্পসমূহৰ প্ৰভাৱৰ বিষয়ে আশা ব্যক্ত কৰি কয়—ডিব্ৰুগড় অসমৰ দ্বিতীয় ৰাজধানী হিচাপে বিকশিত হৈ উঠোতে, এই উৰণীয়া সেতুসমূহে আমাৰ যান-জঁট সমস্যা যথেষ্ট লাঘৱ কৰিব। এই প্ৰকল্পসমূহৰ সম্পূৰ্ণতাই আমাৰ ঐতিহাসিক চহৰত বিশ্বমানৰ আন্তঃগাঁথনি বিকশিত কৰাৰ ক্ষেত্ৰত চৰকাৰ দিয়া প্ৰতিশ্ৰুতি সমূহ সম্পূৰ্ণৰূপে প্ৰতিফলিত কৰিছে। ড° লীলা গগৈ আৰু ককা নীলমণি ফুকনৰ নামেৰে নামকৰণ কৰি আমি আমাৰ সাংস্কৃতিক অমৰ সত্তাসকলকো সন্মানিত কৰিছো বুলিও উল্লেখ কৰে।
উদ্বোধনী অনুষ্ঠানত বহুসংখ্যক লোকৰ সমাগম হোৱাৰ আশা কৰা হৈছে আৰু ইয়াৰ বাবে ব্যাপক কঠোৰ নিৰাপত্তা ব্যৱস্থা কৰা হৈছে।অনুষ্ঠানটো সুচাৰুৰূপে সম্পন্ন কৰিবলৈ দেওবাৰে সন্ধিয়া সকলো যান-বাহন নিদিষ্ট স্থানৰ পৰা আঁতৰাই ৰখাৰ ঘোষণা কৰা হৈছে।
দুয়োটা উদ্বোধন ডিব্ৰুগড়ৰ আন্তঃগাঁথনিৰ
বাবে এক বৃহৎ সাফল্যৰ অংশ হিচাপে বিবেচিত হৈছে। ইয়াৰ আগতে এই বছৰৰ ২৬ জানুৱাৰীত মুখ্যমন্ত্ৰী ড° শৰ্মাই ৩৭৬ কোটি টকাৰ সমন্বিত বিনিয়োগেৰে অতিৰিক্ত চাৰিটা উৰণীয়া সেতুৰ আধাৰশিলা স্থাপন কৰিছিল। সেই সমাগত প্ৰকল্পসমূহত অন্তৰ্ভুক্ত হৈছে ক্ৰমে ১৫৮ কোটি টকা বাজেটেৰে ১.৪৭ কিলোমিটাৰ দৈৰ্ঘ্যৰ চহৰখনৰ দীৰ্ঘতম আমোলাপট্টী জংছন উৰণীয়া সেতু, ৭২ কোটি টকা ব্যয়েৰে ১.৪৮ কিলোমিটাৰ দৈৰ্ঘ্যৰ লাহোৱাল-বৰডুবি-তিনিচুকীয়া ৰোড সংযোগকাৰী উৰণীয়া সেতু, ৮৪ কোটি টকা ব্যয়ৰ ৮১৪-মিটাৰ মানকটা ৰোড উৰণীয়া সেতু আৰু ৬২ কোটি টকা ব্যয়ৰে ৬৫১-মিটাৰ লেজাই-কলাখোৱা ৰোড উৰণীয়া সেতু।ইফালে নগৰ পৰিকল্পনা বিশেষজ্ঞসকলে কয় যে উক্ত সমগ্ৰ প্ৰকল্প সমূহ সম্পূৰ্ণ হোৱাৰ পিছত,ডিব্ৰুগড় মহানগৰৰ মাজেদি ভ্ৰমণৰ সময় উল্লেখযোগ্যভাৱে যান-জট হ্ৰাস কৰিব আৰু আৱাসিকৰ লগতে, বাণিজ্যিক দিশতো এক সুদূৰপ্ৰসাৰী ইতিবাচক প্ৰভাৱ পেলাব।সমান্তৰালকৈ এনে ছখন আধুনিক উৰণীয়া সেতুৰ সংযোগ ব্যৱস্থাই অৰ্থনৈতিক কাৰ্যকলাপ বৃদ্ধি কৰিব পৰাৰ পূৰ্ণ সম্ভাৱনা আছে।