চাবুৱা-লাহোৱাল বিধানসভা সমষ্টিৰ ভোটগ্ৰহণ কেন্দ্ৰ পৰিদৰ্শন সাধাৰণ পৰ্যবেক্ষক টি.এন. ভেঙ্কটেশৰ
চাইন অন ডেস্ক:
অসম বিধানসভা নিৰ্বাচন, ২০২৬-ৰ পৰিপ্ৰেক্ষিতত সাধাৰণ পৰ্যবেক্ষক টি.এন. ভেঙ্কটেশে (IAS) চাবুৱা-লাহোৱাল সমষ্টিৰ অন্তৰ্গত কেইবাটাও ভোটগ্ৰহণ কেন্দ্ৰ পৰিদৰ্শন কৰে। ভাৰতীয় নিৰ্বাচন আয়োগৰ (ECI) নীতি-নিৰ্দেশনা অনুসৰি নিৰ্বাচনী প্ৰস্তুতি আৰু নূন্যতম নিশ্চিত সুবিধাসমূহৰ উপলব্ধতা পৰ্যালোচনা
কৰাৰ উদ্দেশ্যে তেওঁ এই ভ্ৰমণ কৰে।
পৰিদৰ্শনকালত সাধাৰণ পৰ্যবেক্ষকগৰাকীয়ে ৪৩, ৪৫, ৪৬, ৪৭, ৫০ আৰু ৫১ নম্বৰ ভোটগ্ৰহণ কেন্দ্ৰসমূহ পৰিদৰ্শন কৰে। সাধাৰণ পৰ্যবেক্ষকগৰাকীয়ে শাৰীৰিকভাৱে প্ৰত্যাহ্বান থকা ভোটাৰসকলৰ বাবে সুচল প্ৰৱেশাধিকাৰ নিশ্চিত কৰাৰ ওপৰত গুৰুত্ব আৰোপ কৰে আৰু ভোটগ্ৰহণ কেন্দ্ৰসমূহৰ সঠিক আন্তঃগাঁথনি বাহাল ৰখাৰ প্ৰয়োজনীয়তাৰ বিষয়ে উল্লেখ কৰে।
ইয়াৰ লগতে তেওঁ লক্ষ্য কৰে যে নিৰ্দিষ্ট কিছুমান ভোটগ্ৰহণ কেন্দ্ৰৰ চৌহদত পোহৰৰ ব্যৱস্থা উন্নত কৰাৰ প্ৰয়োজন আছে। তদুপৰি, সহজে চিনাক্তকৰণৰ বাবে বিদ্যালয়সমূহৰ নামফলক সঠিকভাৱে প্ৰদৰ্শন কৰাটো নিশ্চিত কৰিবলৈ তেওঁ সংশ্লিষ্ট কৰ্তৃপক্ষক নিৰ্দেশ দিয়ে। নিৰ্বাচন আয়োগৰ নিয়ম অনুসৰি সকলো ভোটগ্ৰহণ কেন্দ্ৰতে যাতে সময়মতে প্ৰয়োজনীয় সা-সুবিধা উপলব্ধ হয়, তাৰ বাবে জৰুৰীভাৱে সংশোধনমূলক পদক্ষেপ গ্ৰহণ কৰিবলৈ তেওঁ সংশ্লিষ্ট বিষয়াসকলক নিৰ্দেশ দিয়ে।
পৰিদৰ্শনকালত ভেঙ্কটেশে চাহ বাগিচাৰ শ্ৰমিকসকলৰ সৈতেও মত বিনিময় কৰে আৰু ভোটাধিকাৰ সম্পৰ্কে তেওঁলোকৰ সজাগতাৰ বুজ লয়। তেওঁ শ্ৰমিকসকলক নিৰ্বাচনী প্ৰক্ৰিয়াত সক্ৰিয়ভাৱে অংশগ্ৰহণ কৰি 
নিজৰ ভোটাধিকাৰ সাব্যস্ত কৰিবলৈ উৎসাহিত কৰে।