ডিব্ৰুগড়লৈ নতুন বন্দে ভাৰত ৰেল; ৰেলৱে আন্তঃগাঁথনিৰ ব্যাপক উন্নয়নৰ ঘোষণা
ডিব্ৰুগড়ৰ যুৱ নেতা তথা সচেতন নাগৰিক পৰাগ দত্তৰ বিশেষ উদ্যোগ
চাইন অন ডেস্ক:
উজনি অসমৰ যাতায়াত ব্যৱস্থাৰ বাবে এক বিশেষ খবৰ। ডিব্ৰুগড়ৰ পৰা এখন নতুন বন্দে ভাৰত এক্সপ্ৰেছ ৰেল আৰম্ভ কৰাৰ লগতে চহৰখনৰ ৰেলৱে আন্তঃগাঁথনিৰ ব্যাপক উন্নয়নৰ কথা নিশ্চিত কৰিছে প্ৰধানমন্ত্ৰীৰ কাৰ্যালয়ে।
ডিব্ৰুগড়ৰ যুৱ নেতা তথা সচেতন নাগৰিক পৰাগ দত্তই ২০২৫ চনৰ ২১ ডিচেম্বৰত ডিব্ৰুগড়ৰ ৰেলৱে আন্তঃগাঁথনি উন্নয়নৰ দাবী জনাই প্ৰধানমন্ত্ৰী নৰেন্দ্ৰ মোদীলৈ এখন পত্ৰ প্ৰেৰণ কৰিছিল। ইয়াৰ প্ৰত্যুত্তৰত ৯ ফেব্ৰুৱাৰী, ২০২৬ তাৰিখে প্ৰধানমন্ত্ৰীৰ কাৰ্যালয়ে চহৰখনৰ
ৰেল নেটৱৰ্কৰ বাবে এক অভিলাষী উন্নয়নমূলক পৰিকল্পনাৰ কথা সদৰী কৰে।
প্ৰধানমন্ত্ৰীৰ কাৰ্যালয়ৰ পত্ৰ মৰ্মে, ডিব্ৰুগড়ৰ বাবে বৰ্তমান চাৰিটা বৃহৎ উন্নয়নমূলক প্ৰকল্পৰ কাম চলি আছে। ইয়াৰ ভিতৰত আছে ডিব্ৰুগড় ৰেল ষ্টেচনত (DBRG) ৰাষ্ট্ৰীয় পৰ্যায়ৰ সুবিধাসম্পন্ন এটা নতুন বন্দে ভাৰত এক্সপ্ৰেছ টাৰ্মিনাছ স্থাপন, বৰ্তমানৰ ডিব্ৰুগড় ৰেলৱে ৱৰ্কশ্বপক (DBWS) আধুনিক যন্ত্ৰ-পাতিৰে সজ্জিত কৰি ৰাষ্ট্ৰীয় পৰ্যায়ৰ ৱৰ্কশ্বপলৈ ৰূপান্তৰিত কৰা আৰু ডিব্ৰুগড় টাউন (DBRT) ৰেল ষ্টেচনৰ ভৱনটো সকলো ধৰণৰ ৰাষ্ট্ৰীয় পৰ্যায়ৰ যাত্ৰী সুবিধাৰে উন্নত কৰা।
ইয়াৰ উপৰিও, ডিব্ৰুগড়ৰ গাভৰুপথাৰ, নালীয়াপুল,কদমনী আৰু চিৰিং গাঁও কলনীত ৰেল কৰ্মচাৰীসকলৰ বাবে নতুন আৱাসিক গৃহ নিৰ্মাণ কৰা হ’ব, যিয়ে কৰ্মচাৰীসকলৰ দীৰ্ঘদিনৰ বাসস্থানৰ সমস্যা সমাধান কৰিব।
চৰকাৰৰ এই সঁহাৰিক আদৰণি জনাই পৰাগ দত্তই কয়, “ডিব্ৰুগড়ৰ বাবে এয়া এক ঐতিহাসিক মুহূৰ্ত। নতুন বন্দে ভাৰত এক্সপ্ৰেছ আৰু পৰিকল্পিত আন্তঃগাঁথনি উন্নয়নে আমাৰ চহৰখনৰ সংযোগ ব্যৱস্থা সলনি কৰিব আৰু অৰ্থনৈতিক বিকাশত গতি প্ৰদান কৰিব।”
ৰেলৱে সূত্ৰই নিশ্চিত কৰিছে যে উত্তৰ-পূব সীমান্ত ৰেলৱেৰ অধীনত ডিব্ৰুগড় আৰু গুৱাহাটী সংযোগী এখন বন্দে ভাৰত এক্সপ্ৰেছ বৰ্তমান পৰিকল্পনাৰ পৰ্যায়ত আছে। এই ছেমি-হাইড স্পীড ৰেল সেৱাই অসমৰ এই দুখন গুৰুত্বপূৰ্ণ চহৰৰ মাজত ভ্ৰমণৰ সময় যথেষ্ট হ্ৰাস কৰিব বুলি আশা কৰা হৈছে, যাৰ ফলত অঞ্চলটোত ব্যৱসায় আৰু পৰ্যটনৰ সম্ভাৱনা বৃদ্ধি পাব।
উজনি অসমত ৰেল সংযোগৰ ক্ষেত্ৰত বন্দে ভাৰত সেৱাই এক আমূল পৰিৱৰ্তন আনিব। থলুৱা প্ৰযুক্তিৰে নিৰ্মিত এই ছেমি-হাইড স্পীড ৰেলসমূহ বিশ্বমানৰ সা-সুবিধা, দ্ৰুত গতি আৰু উন্নত যাত্ৰী আৰামৰ বাবে জনাজাত।
ডিব্ৰুগড় ৰেলৱে ৱৰ্কশ্বপক ৰাষ্ট্ৰীয় মানলৈ উন্নীতকৰণৰ সিদ্ধান্ত অতি গুৰুত্বপূৰ্ণ, কিয়নো ই কৰ্মসংস্থাপনৰ সুযোগ সৃষ্টি কৰাৰ লগতে চহৰখনক উত্তৰ-পূবৰ এক প্ৰধান ৰেল মেৰামতি কেন্দ্ৰ হিচাপে গঢ়ি তুলিব। লগতে ডিব্ৰুগড় টাউন ষ্টেচনৰ আধুনিকীকৰণে হাজাৰ হাজাৰ দৈনিক যাত্ৰীৰ ভ্ৰমণৰ অভিজ্ঞতা উন্নত কৰিব।এই উন্নয়নমূলক পদক্ষেপসমূহ উত্তৰ-পূবৰ ৰেল আন্তঃগাঁথনি উন্নত কৰা আৰু উন্নত সংযোগৰ জৰিয়তে অঞ্চলটোক দেশৰ বাকী অংশৰ সৈতে অধিক ফলপ্ৰসূভাৱে সংলগ্ন কৰিব।