কথমপি ৰক্ষা পৰিল মুম্বাইৰ আন্তঃৰাষ্ট্ৰীয় বিমানবন্দৰ
Air India আৰু IndiGoৰ দুখন বিমানৰ মাজত ৰানৱে’ত সংঘৰ্ষ!
মোম্বাই:
এক ভয়ংকৰ বিমান দুৰ্ঘটনা সংঘটিত হোৱাৰ পৰা কথমপি ৰক্ষা পৰিল মুম্বাইৰ ছত্ৰপতি শিৱাজী মহাৰাজ আন্তঃৰাষ্ট্ৰীয় বিমানবন্দৰ। দেশৰ দুটা প্ৰধান বিমান সংস্থা Air India আৰু IndiGoৰ দুখন বিমানৰ মাজত ৰানৱে’ত সংঘৰ্ষ হয়।
সৌভাগ্যক্ৰমে এই সংঘৰ্ষত কোনো যাত্ৰী আহত হোৱা নাই যদিও নিৰাপত্তাজনিত কাৰণত দুয়োখন বিমানকে তাৎক্ষণিকভাৱে গ্ৰাউণ্ড কৰা হয়, অৰ্থাৎ বিমান দুখনৰ উৰণ বাতিল কৰা হয়।
এয়াৰ ইণ্ডিয়াৰ বিমানখন উৰণৰ বাবে সাজু হৈ থকাৰ সময়তে আৰু ইণ্ডিগ’ বিমানখন অৱতৰণ কৰাৰ পিছত পাৰ্কিং লটৰ কাষ চাপি অহাৰ সময়তে এই দুৰ্ভাগ্যজনক ঘটনা সংঘটিত হয়। মুম্বাইৰ পৰা কইম্বাটুৰলৈ যোৱা AI 2732 বিমানখন টেক অফৰ বাবে পুছবেকত আছিল। একে সময়তে হায়দৰাবাদৰ পৰা অহা ইণ্ডিগোৰ 6E 791 বিমানখন অৱতৰণৰ পিছত টেক্সি ৱে’ৰে ওলাই আহিছিল। দুয়োখন বিমানৰ উইং ইখনৰ সিখনৰ অতি ওচৰলৈ আহিছিল, যাৰ ফলত সংঘৰ্ষৰ সৃষ্টি হয়। দুয়োখন বিমানৰ সোঁ উইঙৰ মূৰত সংঘৰ্ষ হয়। এই খুন্দাখুন্দিৰ ফলত জোকাৰণিৰ সৃষ্টি হয় আৰু যাত্ৰীসকলৰ মাজত কিছু সময়ৰ বাবে আতংকৰ সৃষ্টি হয়। সৌভাগ্যক্ৰমে সকলো যাত্ৰী সম্পূৰ্ণ নিৰাপদ আৰু আঘাতপ্ৰাপ্ত হোৱাৰ পৰা ৰক্ষা পৰে।
দুৰ্ঘটনাৰ সময়ত দুয়োখন বিমান যাত্ৰীৰে ভৰি আছিল। সংঘৰ্ষৰ লগে লগে ATC আৰু গ্ৰাউণ্ড ষ্টাফে প্ৰয়োজনীয় ব্যৱস্থা গ্ৰহণ কৰে। সকলো যাত্ৰী সম্পূৰ্ণ নিৰাপদে থকাটো সৌভাগ্যজনক কথা। বিমান সংস্থাসমূহে নিৰাপদে যাত্ৰীসকলক উলিয়াই আনি অন্য বিমানেৰে গন্তব্যস্থানলৈ প্ৰেৰণ কৰাৰ ব্যৱস্থা কৰে। তাৰপিছত দুয়োখন বিমানৰ গ্ৰাউণ্ড, তদন্ত আৰম্ভ হয়। দুৰ্ঘটনাৰ পিছত দুয়োখন বিমানৰ উইঙৰ ক্ষতিসাধন হয়। অসামৰিক বিমান পৰিবহণ সঞ্চালকালয়ক এই সন্দৰ্ভত অৱগত কৰি গ্ৰাউণ্ড ক্লিয়াৰেঞ্চৰ ভুল ক’ত সংঘটিত হৈছে সেইটো নিৰ্ণয় কৰিবলৈ তদন্ত আৰম্ভ কৰা হৈছে। বৰ্তমান দুয়োখন বিমান মেৰামতি আৰু তদন্তৰ বাবে গ্ৰাউণ্ড কৰা হৈছে।
ঘটনাৰ লগে লগে দুয়োটা বিমান সংস্থাই চৰকাৰী বিবৃতি জাৰি কৰি পৰিস্থিতি সন্দৰ্ভত স্পষ্টীকৰণ দিয়ে। Air Indiaৰ এগৰাকী মুখপাত্ৰই কয় যে টেক্সিৱে’ত ৰৈ থকাৰ সময়ত তেওঁলোকৰ বিমানৰ উইংটিপ ক্ষতিগ্ৰস্ত হৈছে, আৰু সতৰ্কতামূলক ব্যৱস্থা হিচাপে বিমানখন গ্ৰাউণ্ড কৰি কাৰিকৰী তদন্ত আৰম্ভ কৰা হৈছে। যাত্ৰীসকলক নিৰাপদে নমাই দিয়া হয়, আৰু তেওঁলোকৰ গন্তব্যস্থানলৈ বিমান নিশ্চিত কৰাৰ বাবে বিকল্প ব্যৱস্থা কৰা হৈছে।
বিমানৰ ৰক্ষণাবেক্ষণ পৰিদৰ্শন
ইণ্ডিগ’ৰ এগৰাকী মুখপাত্ৰয়ো নিশ্চিত কৰিছে যে তেওঁলোকৰ বিমানখনৰ উইংটিপটোৱে আনখন বিমানৰ সৈতে সংঘৰ্ষত লিপ্ত হোৱাৰ পিছত পাৰ্কিং লটৰ কাষ চাপিছিল। ইণ্ডিগ’ই জনোৱা মতে, প্ৰতিষ্ঠিত প্ৰট’কল অনুসৰি এই কাণ্ডৰ
বিষয়ে কৰ্তৃপক্ষক জনোৱা হৈছে আৰু বিমানখনৰ ৰক্ষণাবেক্ষণ পৰিদৰ্শন চলি আছে। দুয়োটা বিমান সংস্থাই কয় যে যাত্ৰীৰ সুৰক্ষা তেওঁলোকৰ শীৰ্ষ অগ্ৰাধিকাৰ।
কাৰিকৰী কাৰণ প্ৰকাশ
অসামৰিক বিমান পৰিবহণ সঞ্চালকালয় (DGCA)ৰ মুম্বাইৰ বিষয়াসকল তাৎক্ষণিকভাৱে ঘটনাস্থলীত উপস্থিত হৈ ঘটনাৰ তদন্ত আৰম্ভ কৰে। কাৰিকৰী প্ৰতিবেদন অনুসৰি দুয়োখন বিমান Airbus A320 মডেল। এয়াৰ ইণ্ডিয়াৰ বিমানখনে (VT-TYF) টেক্সিৱে C1ৰ পৰা M4লৈ যোৱাৰ সময়তে ইণ্ডিগ’ বিমানখনে (VT-IFV) টেক্সিৱে B1ত অৱতৰণ কৰি আগবাঢ়ি থকাৰ সময়তে সংঘটিত হয় এই সংঘৰ্ষ।