প্ৰধানমন্ত্ৰীৰ আহ্বানৰ প্ৰতি সঁহাৰি
মনোহাৰী বাগিচাৰ ৩০ গৰাকী শ্ৰমিক অযোধ্যা-বাৰাণসী দৰ্শনৰ বাবে যাত্ৰা
চাইন অন ডেস্ক:
কথা দিয়ামতেই কথা ৰাখিলে দেশৰ প্ৰধানমন্ত্ৰী নৰেন্দ্ৰ মোদীয়ে। প্ৰধানমন্ত্ৰীৰ আহ্বানৰ প্ৰতি সঁহাৰি জনাই অযোধ্যাৰ ৰাম মন্দিৰ আৰু বাৰাণসীৰ কাশী বিশ্বনাথ মন্দিৰ দৰ্শন কৰিবলৈ ৰাওনা হ’ল ডিব্ৰুগড়ৰ মনোহাৰী চাহ বাগিচাৰ ৩০ গৰাকী মহিলা শ্ৰমিক। ‘মিছন চাহ শ্ৰমিক ভাৰত দৰ্শন’ আঁচনিৰ অধীনত প্ৰয়াত জাবৰমল লোহিয়া চেৰিটেবল ট্ৰাষ্ট আৰু অশোক সিংহাল ফাউণ্ডেশ্যনৰ সৌজন্যত কালি পুৱাই অবধ আসাম এক্সপ্ৰেছৰ জৰিয়তে অযোধ্যালৈ ৰাওনা হয় শ্ৰমিকৰ দলটো। ১ এপ্ৰিলত প্ৰধানমন্ত্ৰী মোদীয়ে মনোহাৰী বাগিচাৰ ১৯ গৰাকী মহিলা শ্ৰমিকৰ সৈতে বাৰ্তালাপ কৰি অযোধ্যা আৰু বাৰাণসীলৈ যোৱাৰ আগ্ৰহৰ কথা সুধিছিল। প্ৰধানমন্ত্ৰী মোদীৰ আমন্ত্ৰণক্ৰমে কালি মনোহাৰী বাগিচাৰ মহিলা শ্ৰমিকসকলে ৰাম মন্দিৰ আৰু কাশী বিশ্বনাথ মন্দিৰ দৰ্শন কৰিবলৈ কালি যাত্ৰা আৰম্ভ কৰিছে।
মহিলা শ্ৰমিকৰ দলটোৱে পাঁচ দিন কটোৱাৰ পাছত ৯ এপ্ৰিলত পুৱাই ডিব্ৰুগড় পাবহি।কালি মহিলা শ্ৰমিকৰ দলটোক মনোহাৰী চাহ বাগিচাৰ স্বত্বাধিকাৰী ৰাজেন লোহিয়াই শুভেচ্ছা জনায়। অযোধ্যা আৰু বাৰাণসীলৈ যাত্ৰা কৰা দলটোৱে প্ৰধানমন্ত্ৰী মোদীক কৃতজ্ঞতা 
প্ৰকাশ কৰি কয়, প্ৰধানমন্ত্ৰীয়ে আমাক ৰাম মন্দিৰ চাবলৈ মাতিছে। আমি বহুত আনন্দিত। আমাৰ এতিয়াও বিশ্বাসেই হোৱা নাই। আমাৰ দৰে চাহ শ্ৰমিকক ইমান দূৰলৈ নি প্ৰধানমন্ত্ৰীয়ে অযোধ্যা আৰু বাৰণসী ফুৰাবলৈ নিছে। ভাবিয়েই ভাল লাগিছে। উল্লেখযোগ্য যে, বিধানসভা নিৰ্বাচনৰ পূৰ্বে মহিলা চাহ শ্ৰমিকসকলৰ সৈতে প্ৰধানমন্ত্ৰী নৰেন্দ্ৰ মোদীয়ে চাহ পাত ছিঙাৰ লগতে তেওঁলোকৰ জীৱন-জীৱিকাৰ বিষয়ে সম্পৰ্কে বাৰ্তালাপ কৰি দেশজুৰি চৰ্চা হৈছিল। মহিলা শ্ৰমিকসকলৰ পৰা এটি কলি দুটি পাতৰ সৈতে পৰিচয় হৈছিল প্ৰধানমন্ত্ৰী নৰেন্দ্ৰ মোদী। চাহ শ্ৰমিক মহিলাসকলৰ সৈতে অতি সহজ তথা সৰলভাৱে কথা পাতি তেওঁলোকৰ সন্তানৰ শিক্ষা, দৈনিক মজুৰি, কামৰ সময় আৰু আয়ুষ্মান ভাৰত স্বাস্থ্য কাৰ্ড লাভ কৰিছিল নে নাই সেই বিষয়ে জানিবলৈ চেষ্টা কৰিছিল মোদীয়ে। ইয়াৰ উপৰিও তেওঁ চাহ বাগিচাৰ ভিতৰত থকা চিকিৎসালয়ৰ সা-সুবিধাৰ বুজ লৈ ক’ত ক’ত ভ্ৰমণৰ বাবে গৈছিল সেই বিষয়ে সুধিছিল। নিজেও চাহ বিক্ৰী কৰাৰ কথা সোঁৱৰি আপ্লুত হৈ অযোধ্যাৰ ৰাম মন্দিৰ দৰ্শন কৰোৱাৰ প্ৰতিশ্ৰুতি প্ৰদান কৰিছিল প্ৰধানমন্ত্ৰী মোদীয়ে। পৰৱৰ্তী সময়ত প্ৰধানমন্ত্ৰী মোদীয়ে এক্স হেণ্ডেলৰ জৰিয়তে চাহ জনজাতীয় সমাজৰ প্ৰতি শ্ৰদ্ধা নিবেদন কৰি কয়, প্ৰতিটো চাহ বাগান পৰিয়ালৰ প্ৰচেষ্টাক লৈ আমি অতি গৌৰৱান্বিত। তেওঁলোকৰ পৰিশ্ৰম আৰু দৃঢ়তাই অসমৰ গৌৰৱ বৃদ্ধি কৰিছে। আন এটা পোষ্টত তেওঁ আনন্দৰে লিখে, চাহ পাত ছিঙাৰ পিছত মহিলাসকলে তেওঁলোকৰ সংস্কৃতিৰ বিষয়ে কথা পাতিলে আৰু লগতে চেলফী লোৱা বিষয়ে উল্লেখ কৰিছিল। পবিত্ৰ ৰাম মন্দিৰ অযোধ্যা আৰু কাশী বিশ্বনাথ মন্দিৰ বাৰাণসীলৈ আধ্যাত্মিক আৰু সাংস্কৃতিক যাত্ৰাই সাংস্কৃতিক বিনিময়ক প্ৰসাৰিত কৰা আৰু ৰাষ্ট্ৰীয় সংহতি শক্তিশালী কৰাৰ বহল দৃষ্টিভংগীৰ সৈতে মিল আছে বুলি কৈ চাহ শ্ৰমিকসকলক ভাৰতৰ চহকী ঐতিহ্য আৰু বৈচিত্ৰময় পৰম্পৰাৰ সৈতে অৰ্থপূৰ্ণ পৰিচয় প্ৰদান কৰা, জাতিটোৰ প্ৰগতিৰ বিষয়ে তেওঁলোকৰ বুজাবুজি বৃদ্ধি কৰা, আৰু 
তেওঁলোকৰ কৰ্মক্ষেত্ৰৰ বাহিৰত দেশখনক অন্বেষণ আৰু সংযোগ স্থাপনৰ এক অনন্য সুযোগ প্ৰদান কৰিব বুলি আশা কৰা হৈছে।