ডিব্ৰুগড় বিমান বন্দৰৰ সম্প্ৰসাৰিত ৰানৱেত প্ৰথমখন বিমানৰ অৱতৰণ
আঞ্চলিক সংযোগৰ এক নতুন যুগৰ সূচনা
চাইন অন ডেস্ক:
উজনি অসমৰ বিমান পৰিবহণ খণ্ডৰ বাবে এক ঐতিহাসিক ক্ষণত, আজি ডিব্ৰুগড় বিমানবন্দৰে ইয়াৰ নতুনকৈ সম্প্ৰসাৰিত ৰানৱে আৰু উন্নত CAT-I পোহৰ প্ৰণালী আনুষ্ঠানিকভাৱে কাৰ্যক্ষম কৰে।এই অত্যাধুনিক আন্তঃগাঁথনিৰ প্ৰথমটো গুৰুত্বপূৰ্ণ সফলতাৰে আজি সম্পন্ন হয়, যেতিয়া কলকাতাৰ পৰা অহা ইণ্ডিগ’ৰ ৬ই ৮৯৩ বিমানখনে পুৱা ৮:৩৮ বজাত সফলতাৰে অৱতৰণ কৰে। ইয়াৰ লগে লগে আঞ্চলিক সংযোগৰ এক নতুন যুগৰ আনুষ্ঠানিক সূচনা হয়।
এই প্ৰকল্পৰ অধীনত ৰানৱেৰ দৈৰ্ঘ্য পূৰ্বৰ ১,৮৩০ মিটাৰৰ পৰা ২,২৯১ মিটাৰলৈ বৃদ্ধি কৰা হৈছে, যিটো A320 শ্ৰেণীৰ বিমানৰ অৱতৰণৰ সময়ত স্বৃষ্টি হব পৰা ওজনৰ বাধা দূৰ কৰিবলৈ নিৰ্মাণ কৰা হৈছে। পূৰ্বতে চুটি 
ৰানৱেৰ বাবে বিমানসমূহে প্ৰায়েই “লোড পেনাল্টি”ৰ সন্মুখীন হ’বলগীয়া হৈছিল, অৰ্থাৎ সুৰক্ষিত অৱতৰণৰ বাবে কম যাত্ৰী বা কম ইন্ধন কঢ়িয়াব লগা হৈছিল। ৰানৱেৰ সম্প্ৰসাৰণ আৰু CAT-I (Category-I) পোহৰ প্ৰণালীৰ সংযোগৰ ফলত এতিয়া নিশাৰ ভাগত আৰু অসমৰ প্ৰবল বৰষুণ বা শীতকালৰ কুৱঁলীৰ দৰে কম দৃশ্যমান পৰিৱেশতো বিমান চলাচল অধিক সুৰক্ষিত হ’ব। অঞ্চলটোৰ বিশেষ জলবায়ু পৰ্যবেক্ষণৰ বাবে এই সুবিধাত এটা নতুন স্বয়ংক্ৰিয় বতৰ নিৰীক্ষণ প্ৰণালী (AWOS) অন্তৰ্ভুক্ত কৰা হৈছে।
এই বিশেষ ক্ষণটো অধিক স্মৰণীয় কৰি ৰাখিবলৈ ডিব্ৰুগড় বিমানবন্দৰৰ ভাৰতীয় বিমানবন্দৰ প্ৰাধিকৰণে (AAI) উদ্বোধনী বিমানখনৰ পাইলট আৰু ফাৰ্ষ্ট অফিচাৰক সম্বৰ্ধনা জনায়। ইয়াৰ জৰিয়তে উচ্চ ক্ষমতা সম্পন্ন পৰিচালনা ব্যৱস্থাৰ আনুষ্ঠানিক যাত্ৰা আৰম্ভ হয়।
ডিব্ৰুগড় বিমানবন্দৰৰ সঞ্চালক বংগজিৎ সাহাই কয়, “সম্প্ৰসাৰিত ৰানৱে আৰু CAT-I লাইটিং ব্যৱস্থা এই অঞ্চলৰ বাবে এক আমূল পৰিৱৰ্তনকাৰী পদক্ষেপ হিচাপে বিবেচিত হ’ব। ই উজনি অসমৰ বিমান চলাচল, সুৰক্ষা আৰু সামগ্ৰিক সংযোগ ব্যৱস্থাৰ লক্ষণীয় উন্নতি সাধন কৰিব। এই উন্নয়নে আমাৰ বিমান যাত্ৰাৰ আন্তঃগাঁথনি শক্তিশালী কৰাৰ লগতে ভৱিষ্যতে নিৰ্ভৰযোগ্য সময়সূচী আৰু অধিক বিমান চলাচলৰ সম্ভাৱনা বৃদ্ধি কৰিব।”
এই আধুনিকীকৰণে বিশেষকৈ চাহ উদ্যোগ আৰু পৰ্যটন খণ্ডৰ জৰিয়তে স্থানীয় অৰ্থনীতিলৈ এক ইতিবাচক পৰিৱৰ্তন আনিব বুলি আশা কৰা হৈছে। বিমানবন্দৰৰ বিষয়াসকলৰ মতে, CAT-I প্ৰণালীয়ে অৱতৰণৰ বাবে প্ৰয়োজনীয় নূন্যতম 
দৃশ্যমানতা হ্ৰাস কৰিব, যাৰ ফলত প্ৰতিকূল বতৰত বিমানৰ দিশ পৰিৱৰ্তন বা বাতিল হোৱাৰ সমস্যা বহু পৰিমাণে কমি যাব।
ডিব্ৰুগড় যিহেতু অসমৰ দ্বিতীয় ৰাজধানী আৰু উত্তৰ-পূবৰ এক গুৰুত্বপূৰ্ণ প্ৰৱেশদ্বাৰ হিচাপে পৰিগণিত হৈছে, এই আন্তঃগাঁথনিগত মাইলৰ খুঁটিয়ে আন্তঃৰাষ্ট্ৰীয় সুৰক্ষা মানদণ্ড অক্ষুণ্ণ ৰাখি আধুনিক বিমান যাত্ৰাৰ বৰ্ধিত চাহিদা পূৰণ কৰাত সহায় কৰিব।