ভৱানীপুৰত নকল সোণৰ মূৰ্ত্তি !
সৰবৰাহকাৰী এজনক আটক
সৰুপেটা:
ভৱানীপুৰ আৰক্ষী চকীৰ অন্তৰ্গত বাংলীপাৰাত কালি এটা নকল সোণৰ মূৰ্ত্তি আৰক্ষীয়ে জব্দ কৰাৰ লগতে এগৰাকী নকল সোণ সৰবৰাহকাৰীক আটক কৰিবলৈ সক্ষম হৈছে।
জানিব পৰা মতে ভৱানীপুৰ আৰক্ষী চকীৰ ভাৰপ্ৰাপ্ত আৰক্ষী বিষয়া মানস প্ৰতীম কুমাৰে গোপন সূত্ৰৰ তথ্যৰ ভিত্তিত কালি বিয়লি প্ৰায় ৪-৩০ বজাত বাংলীপাৰাৰ বি পি চি এল পেট্ৰল পাম্পৰ সমীপত সন্দেহজনক ভাৱে ৰৈ থকা লোক এজনক কৰায়ত্ত কৰি তালাচী চলোৱাত লগত থকা মোনা এটাৰ পৰা নকল সোণৰ যীশু খ্ৰীষ্টৰ মূৰ্তি এটা উদ্বাৰ হয়। আৰক্ষীয়ে মূৰ্ত্তি সহ লোকজনক ভৱানীপুৰ আৰক্ষী চকীলৈ লৈ আহি সোধা পোছা কৰে। উল্লেখযোগ্য যে নীলা আৰু বগা ৰঙৰ গামোচাৰে মেৰিয়াই অনা সোণৰ বৰণীয়া ধাতুৰে নিৰ্মিত মূৰ্তিটোৰ ২.০৪৪ কিলোগ্ৰাম ওজন আৰু আটকাধীন শ্বহিদুল ইছলাম (২৪)ৰ ঘৰ লখিমপুৰ জিলাৰ বিহপুৰীয়াৰ সোণাপুৰ গাওঁৰ বুলি জানিবপৰা গৈছে।