জাগুন কেম্পত আলফা-স্বাধীনৰ আক্ৰমণ
উদ্ধাৰ হোৱা অবিস্ফোৰিত RPG আৰু UBGL বোমা সেনাৰ বিশেষজ্ঞ দলৰ নিষ্ক্ৰিয়
চাইন অন ডেস্ক:
তিনিচুকীয়া জিলাৰ জাগুনত থকা অসম আৰক্ষীৰ কমাণ্ডো বেটেলিয়ানৰ শিবিৰত সংযুক্ত মুক্তি বাহিনী, অসম-স্বাধীন (আলফা-আই)-এ চলোৱা দুঃসাহসিক প্ৰাক-প্ৰত্যুষৰ আক্ৰমণৰ কেইঘণ্টামানৰ ভিতৰতে ভাৰতীয় সেনাই এক সম্ভাব্য ভয়াবহ বিপদ দূৰ কৰিবলৈ তৎপৰতাৰে পদক্ষেপ গ্ৰহণ কৰে। আক্ৰমণৰ পিছত শিবিৰত ৰৈ যোৱা কেইবাটাও অবিস্ফোৰিত গোলা-বাৰুদ সেনাই সফলতাৰে নিষ্ক্ৰিয় কৰে।
২২ মাৰ্চৰ পুৱা প্ৰায় ২:০৫ বজাত সংঘটিত হোৱা এই আক্ৰমণত আলফা-আইৰ সদস্যসকলে জাগুনৰ ১০ মাইল এলেকাত অৱস্থিত কমাণ্ডো কেম্পটোলৈ লক্ষ্য কৰি কেইবাটাও ৰকেট প্ৰপেল্ড গ্ৰেনেড (RPG) নিক্ষেপ কৰিছিল, যাৰ ফলত চাৰিজন কমাণ্ডো আহত হয়। 
RPG ৰ উপৰিও ঘটনাস্থলীত আণ্ডাৰ-বেৰেল গ্ৰেনেড লাঞ্চাৰ (UBGL)-ৰ গোলাও উদ্ধাৰ হয়। যি পৰৱৰ্তী সময়ত স্থানীয় সাধাৰণ ৰাইজৰ বাবে এক গুৰুতৰ ভাবুকিৰ সৃষ্টি কৰিছিল।সেয়ে কোনো পলম নকৰাকৈ
‘ৰেড শ্বিল্ড ছেপাৰ্ছ’ (Red Shield Sappers)-এ অসম ৰাইফলছৰ সৈতে সমন্বয় ৰাখি এটা বিশেষজ্ঞ বোমা নিষ্ক্ৰিয়কাৰী দলক ঘটনাস্থলীলৈ প্ৰেৰণ কৰে। পৰিস্থিতি সম্পূৰ্ণৰূপে নিয়ন্ত্ৰণলৈ আনিবলৈ অঞ্চলটো তৎক্ষণাত ঘেৰি পেলোৱা হয় আৰু কঠোৰভাবে কটকটীয়া নিৰাপত্তা বেষ্টনী গঢ়ি তোলা হয়।
অবিস্ফোৰিত গোলাবোৰ পৰৱৰ্তী সময়ত জনবসতিহীন এক সুৰক্ষিত স্থানলৈ লৈ যোৱা হয় আৰু তাত এক নিৰ্দিষ্ট পদ্ধতিৰে সেইবোৰ নিষ্ক্ৰিয় কৰা হয়। ইয়াৰ ফলত আশে-পাশে থকা অঞ্চলৰ জীৱন আৰু সম্পত্তিৰ প্ৰতি থকা সকলো বিপদ দূৰ হয়।
সেনাৰ এজন বিষয়াই জানিবলৈ দিয়ে যে, “RPG আৰু UBGL গোলাসহ অবিস্ফোৰিত যুদ্ধাস্ত্ৰসমূহ চিনাক্ত কৰি পেছাদাৰী ধৰণে সুৰক্ষিত কৰা হৈছিল। গোটেই অভিযানটোত সুৰক্ষাৰ সকলো দিশ কঠোৰভাৱে পালন কৰা হৈছিল। আমাৰ দলসমূহৰ দ্ৰুত আৰু সমন্বিত সঁহাৰিয়ে স্থানীয় লোকসকলৰ নিৰাপত্তা নিশ্চিত কৰিলে আৰু কোনো ধৰণৰ পাৰ্শ্বীয় ক্ষতি (collateral damage) হ’বলৈ নিদিলে। বোমা নিষ্ক্ৰিয়কাৰী দলটোৱে প্ৰদৰ্শন কৰা দক্ষতা আৰু সূক্ষ্মতা সঁচাকৈয়ে প্ৰশংসনীয়।”
আলফা-আইয়ে দায়িত্ব স্বীকাৰ কৰা আৰু সংগঠনটোৱে “অপাৰেচন বুজনি” নাম দিয়া জাগুনৰ এই আক্ৰমণটোৱে সমগ্ৰ অসমৰ নিৰাপত্তা ব্যৱস্থাত জোকাৰণি তুলিছে, বিশেষকৈ ৯ এপ্ৰিলত হ’বলগীয়া ৰাজ্যৰ নিৰ্বাচনৰ মাত্ৰ কেইদিনমান পূৰ্বে।
এই আক্ৰমণৰ বাবে দায়ী আলফা-আইৰ সদস্যসকলক ধৰিবলৈ বৰ্তমান সমগ্ৰ তিনিচুকীয়া জিলাজুৰি নিৰাপত্তা বাহিনীৰ এক বিশাল তালাচী অভিযান অব্যাহত আছে।