অসম ৰাজ্যিক বিদ্যুৎ পৰিষদ ৭৭ সংখ্যক প্ৰাইজমানী স্বাধীনতা দিৱস কাপ ফুটবল প্ৰতিযোগিতাত চূড়ান্ত বিজয়ী
শ্ৰেষ্ঠ খেলুৱৈ বিদ্যৎ পৰিষদ দলৰ পাপু দেউৰী আৰু সৰ্বোচ্চ গʼলদাতা ছাদাৰ দলৰ লুং মিংৰন
বিজয়ীৰ সন্মান অৰ্জনকাৰী দলে ট্ৰফী সহ দুই লাখ টকা আৰু বিজিত দলে ট্ৰফীসহ এক লাখ টকা লাভ
নগাঁও:
ইতিহাস ৰচনা কৰি প্ৰাক্তন চেম্পিয়ন অসম ৰাজ্যিক বিদ্যুৎ পৰিষদৰ ফুটবল ক্লাবে নগাঁও ক্ৰীড়া সংস্থাৰ ৭৭ সংখ্যক সৰ্বভাৰতীয় আমন্ত্ৰণমূলক প্ৰাইজমানী স্বাধীনতা দিৱস কাপ ফুটবল প্ৰতিযোগিতাত চূড়ান্ত বিজয়ীৰ সন্মান অৰ্জন কৰিবলৈ সক্ষম হৈছে। কালি নগাঁও ক্ৰীড়া সংস্থাৰ নুৰুল
আমিন ষ্টেডিয়ামত নৈশ আলোকত অনুষ্ঠিত তীব্ৰ প্ৰতিদ্বন্দিতাপূৰ্ণ চূড়ান্ত খেলখনত বিদ্যুৎ পৰিষদে মণিপুৰৰ ছাদাৰ হিলছ ফুটবল ক্লাবক চাডেন ডেথৰ সহায়ত ১৫-১৪ গʼলত পৰাস্ত কৰে। উল্লেখ্য যে নিৰ্ধাৰিত সময়ত খেলখন ২-২ গʼলত ড্ৰʼ ৰূপে সমাপ্ত হয়।পিছত টাইব্ৰেকাৰতো দুয়ো দলে সমতা স্থাপন কৰাত চাডেন ডেথৰ সহায়ত ফলাফল নিৰ্ণয় কৰা হয়। চূড়ান্ত খেলখন আনুষ্ঠানিকভাৱে উদ্বোধন কৰে ৰাজ্যৰ তথ্য-জনসংযোগ আৰু জলসম্পদ আদি বিভাগৰ মন্ত্ৰী পীয়ূষ হাজৰিকাই। ভাষণ প্ৰসংগত হাজৰিকাই অহা বছৰ জাগীৰোড আৰু আঁহতগুৰিতো খেলৰ স্থান নিৰ্ধাৰণৰ বাবে উদ্যোক্তাসকলক অনুৰোধ জনায়। প্ৰতিযোগিতাত বিজয়ীৰ সন্মান অৰ্জনকাৰী দলে ট্ৰফী সহ দুই লাখ টকা আৰু বিজিত দলে ট্ৰফীসহ এক লাখ টকা লাভ কৰে। প্ৰায় ছয় হাজাৰ দৰ্শকে উপভোগ কৰা চূড়ান্ত খেলখনৰ শ্ৰেষ্ঠ খেলুৱৈৰ বঁটা লাভ কৰে বিদ্যৎ পৰিষদ দলৰ পাপু দেউৰী আৰু সৰ্বোচ্চ গʼলদাতাৰ বঁটা লাভ কৰে ছাদাৰ দলৰ লুং মিংৰনে। প্ৰতিযোগিতাৰ অন্তত নগাঁও-বটদ্ৰৱা সমষ্টিৰ বিধায়ক ৰূপক শৰ্মা,জিলা পৰিষদৰ সভাপতি গীতাঞ্জলি শইকীয়া,পৌৰ উপ-সভাপতি সীমান্ত বৰা প্ৰমুখ্যে ব্যক্তিসকলে বঁটাসমূহ বিতৰণ কৰে।